Deputeti i Partisë Demokratike, Dashnor Sula ka analizuar situatën politike dhe strategjinë e opozitës për zgjedhjet parlamentare të 11 majit.
Sipas Sulës, angazhimi i diasporës është një faktor kyç për suksesin e opozitës, por ai thekson se nuk ka pasur asnjë presion për përfshirjen e tyre. “Berisha dhe kryesia e PD nuk kanë vënë askënd nën presion për t’u angazhuar me diasporën, sepse kjo varet edhe nga financat individuale. Por kushdo që ka lidhje me opozitën duhet të bëjë detyrën e vet,” – deklaroi ai.
Sula u shpreh i bindur se vota e diasporës do të përmbysë ekuilibrat politikë në favor të opozitës. “Raporti do të jetë 2 me 1 në favorin tonë kundrejt mazhorancës. Emigrantët që vijnë në takimet tona nuk janë të detyruar, ata nuk kanë interesa te opozita, por besojnë te ndryshimi,” – shtoi ai.
Në lidhje me përzgjedhjen e kandidatëve për deputetë, Sula theksoi rëndësinë e një liste të fortë dhe përfaqësuese.
“Duhet të kemi kandidatët më të mirë të mundshëm. Nëse lista është dinjitoze, jam i bindur se do të triumfojmë”, tha ai. Ai vuri në dukje gjithashtu rolin e aleatëve historikë të PD si Fatmir Mediu dhe Agron Duka, duke theksuar se bashkëpunimi me ta është i domosdoshëm për suksesin e opozitës.
