Kryeministri Edi Rama ka komentuar sot vendimin e Gjykatës Kushtetuese dhe situatën e krijuar në Bashkinë e Tiranës, duke e cilësuar të padrejtë lënien e kryeqytetit pa një kryetar të zgjedhur me votë.
Rama theksoi se arrestimi i kryetarit të Bashkisë ishte “disproporcional” dhe nuk justifikonte boshllëkun institucional në krye të Tiranës.
Megjithatë, kryeministri nënvizoi pavarësinë e drejtësisë: “Drejtësia është e pavarur, falë një hapi të jashtëzakonshëm që kemi bërë për ta pavarësuar pas 100 e kusur vitesh”.
Rama komentoi edhe arsyet e mbajtjes së zgjedhjeve, duke theksuar se ato nuk ishin për të fajësuar kryetarin, por sepse ai ishte në pamundësi për të kryer detyrën.
Lidhur me vendimin e Gjykatës Kushtetuese, ai tha se nuk beson të ketë pasur ndikim politik, por sipas tij ky vendim tregon nevojën për hapin e radhës, pra Velija në krye të Bashkisë në mënyrë që të kryejë detyrën.
“Duhet të ishte kryetari Veliaj për të prezantuar buxhetin 2026, por ju e dini mirë situatën. Është për të ardhur keq, megjithatë ka shumë gjëra për të ardhur keq. Çfarë nuk thuhet në këtë vend. E gjithë bota jeton në një atmosferë me dhjetëra tituj në sekondë ëebfaqe, dhe ndër 100 tituj që lexoni, ju siguroj se 99% janë ose gjysmë të vërteta ose komplet rrena.
Kur kryetari i bashkisë u mor nga zyra për t’u mbyllur në qeli pa gjyq, për herë të parë ngrita zërin për një proces të drejtësisë duke thënë se është disproporcionale për faktin se cilado qoftë arsyeja pse drejtësia heton kryetarin e bashkisë, janë të pamjaftueshme për sa kohë s’ka vrarë njeri dhe s’është kapur në flagrancë duke bërë krim, për ta lënë Tiranën pa kryetar bashkie të zgjedhur.
Drejtësia është e pavarur sot, falë një hapi të jashtëzakonshëm që ka bërë PS për ta pavarësuar drejtësinë në Shqipëri pas 100 e kusur vitesh shtet.
Pastaj në të gjithë shkallët ku kryetari kërkoi hetimin në gjendje të lirë e humbi, dhe kur u ezauruan të gjitha shkallët ishte gjëja më normale të mendohej për qytetin e njerëzit që kanë edhe ata një të drejtë shumë të madhe themelore, për t’u qeverisur nga të zgjedhurit e tyre. Për këtë ndërmorëm hapin tjetër, që të hapim rrugën e zgjedhjeve në bashki. Jo për të fajësuar kryetarin e bashkisë dhe as i lidhur me faktin se mungonte në detyrë se kishte arsye të vetat, por lidhur me faktin që kryetari në pamundësi për të kryer detyrën të mos kthehej në një problem gjithmonë e më të madh për qytetin.
Asnjë qytet nuk mund të qeveriset me telekomandë apo delegim. Qyteti ka nevojë për të zgjedhurin legjitim që t’a drejtojë atë. Pavarësisht përpjekjes që bëmë nuk ia dolëm sepse Kushtetuesja refuzoi t’i hapë rrugë zgjedhjeve në Tiranë.
Vendim që ne e respektojmë, madje s’kam asnjë arsye të besoj se GJK ka bërë politikë në këtë rast. Kam arsye të besoj se Gjykata ka menduar ndryshe, por mendimi ndryshe i gjykatës të çon në konkluzionin që kur kryetari i bashkisë shkon atje për të kërkuar për ta kthyer në zyrë, duhet ta kthejë në zyrë sepse vetë ka thënë që nuk mund të bëhen zgjedhje në Tiranë se ai është i zgjedhur.
Atëherë ta kthejë në zyrë që të normalizohet një situatë që është çdo ditë e më e vështirë për kryeqytetin”, tha ai.
