Një xhest i shëmtuar dhe intimidues. Kështu e konsideron Këshilli Shqiptar i Medias veprimin e sotëm të kryeministrit Edi Rama, i cili preku në faqe dhe shtyu gazetaren Ambrozia Meta, pas pyetjes së kësaj të fundit.
Në një reagim në rrjetet sociale, KSHM dënon veprimin e kreut të qeverisë, teksa sipas saj, ky i fundit duhet të kuptojë që nëse pyetjet e gazetarëve janë etike apo jo, nuk janë në tagrin e tij për ta përcaktuar.
“Kryeministri shqiptar duhet të kuptojë që nuk ka pyetje të gabuara apo pyetje jo-etike, të gabuara ose jo-etike janë fyerjet që ai bën ndaj gazetarëve, me termat “padije” dhe “injorancë”. Këto përgjigje përbëjnë një agresion verbal që krijon një kulturë frikësimi ndaj gazetarëve për të bërë pyetje.” – thuhet më tej në reagimin e KSHM-së.
Këshilli Shqiptar i Medias shprehet se refuzimi publik i kryeministrit për të kërkuar falje është një argument më shumë pse liria e shtypit në Shqipëri është në nivelet që paraqitet në të gjitha raportet ndërkombëtare.
Këshilli Shqiptar i Medias dënon me forcë sjelljen e Kryeministrit Rama në konferencën e sotme për shtyp, ku Kryeministri, pasi iu shmang pyetjeve të gazetares Ambrozia Meta, bëri një xhest të shëmtuar e intimidues, duke tentuar ta prekë në fytyrë gazetaren.
Kryeministri shqiptar duhet të kuptojë që nëse pyetjet e gazetarëve janë etike apo jo, nuk janë në tagrin e tij për ta përcaktuar. Detyra e Tij kushtetuese është që t’i përgjigjet pyetjeve që i bëhen nga gazetarët, në emër të audiencës së tyre dhe të interesirt publik, në kuadër të parimeve të transparencës dhe llogaridhënies që mbështesin një shoqëri demokratike.
Kryeministri shqiptar duhet të kuptojë që nuk ka pyetje të gabuara apo pyetje jo-etike, të gabuara ose jo-etike janë fyerjet që ai bën ndaj gazetarëve, me termat “padije” dhe “injorancë”. Këto përgjigje përbëjnë një agresion verbal që krijon një kulturë frikësimi ndaj gazetarëve për të bërë pyetje.
Refuzimi publik i Kryeministrit për të kërkuar falje pas këtij agresioni ndaj gazetares Meta, publikuar në platformën X, është një argument më shumë pse liria e shtypit në Shqipëri është në nivelet që paraqitet në të gjitha raportet ndërkombëtare.
KSHM, vëren me shqetësim që për sa kohë qasja e zyrtarëve publikë ndaj pyetjeve të gazetarëve është në standartin e mbartur nga Kryeministri shqiptar, kushtet për liri të medias e për gazetari të lirë, sa vijnë e minimizohen.
