Në takimin me deputetë të qarkut të Tiranës, Kryeministri Edi Rama është ndalur në aksionin për lirimin e hapësirave publike.
Ai u është përgjigjur akuzave se aksioni në Theth po ndërmerret në mënyrë që të ndërtohen resorte turistike.
“Nuk bëhet fjalë për të ndërtuar resorte turistike, është jashtë çdo lloj opsioni. Dua të them që të gjithë teoritë për këtë operacion janë për të ardhur keq dhe dezinformim. Ata që dalin dhe bëjnë zhurmë s’janë banorët e Thethit”, tha ai.
Rama ka paralajmëruar se çdo ndërtim në shkelje të infrastrukturës dhe hapësirës publike do të rrafshohet
“Kemi marrë përsipër qe brenda 2028 të mbyllim procesin e legalizimit, por ta harrojë që dikush do të legalizojë në shkelje të ligjit,. Historia “ndërto sot që të legalizosh nesër” nuk do të ecë më. Çdo ndërtim në shkelje të infrastrukturës dhe hapësirës publike do të rrafshohet”, tha ai.
Po ashtu Rama paralajmëron sistem të ri në furnizimin me naftë: Do të sjellë kontroll mbi çmimin
Edi Rama: “Shumë shpejt për këtë dhe për ujin e pijshëm do të na duhet të bëjmë edhe akt normativ, 83 votat do t’i vëmë në shërbim të qytetarëve që kërkojnë një kapërcim përfundimtar nga kalimi i Shqipërisë europiane në zemër por jo në realitet, në Shqipërinë anëtare në BE.
Të gjithë ata që ishin në skuadrën e 11 majit, të zgjedhur apo jo në Kuvend, do të jenë pjesë e skuadrës që do të përfaqësojnë vendin në BE. Duhet jenë aty për të qenë aty e për të adresuar të gjithë problematikat.
Jemi të sigurt që duhet të kalojmë në një fazë tjetër për shërbimin me ujë dhe duhet të krijojmë operatorin e shpërndarjes së ujit njëlloj si për energjinë, duhet një korporatë e re që të adresojë problemin e investimet, problemet me donatorët dhe fragmentarizimit të burimit dhe menaxhimit që pas 30 e ca kusur vitesh të presim të na sjellë rezultatin e dëshiruar, edhe pse ka përmirësime nga bashkimi i operatorëve, por që janë të pamjaftueshme dhe nuk mund të rrimë të presim. Për ujin dhe menaxhimin e mbetjeve, duhet të kalojmë në nivel kombëtar.
Po punojmë intensivisht për një sistem të ri të furnizimit të naftës, domosdoshmëri dhe mundësi për të kaluar edhe te furnizimi i naftës me një komponent të ri të shtetit si protagonist në realizimin e kontratave dhe furnizimin me naftë. Që mendojmë se do të sjellë një kontroll më të madh në çmimin dhe qarkullimin e naftës”.
