Kryeministri Edi Rama zhvilloi sot takimin përmbyllës të fushatës elektorale në qytetin e Durrësit, ku iu drejtua me tone emocionale dhe ironike mbështetësve dhe kundërshtarëve politikë. Në fjalimin e tij, Rama theksoi rolin historik të Durrësit në raport me Evropën, ndërsa sulmoi opozitën për mungesë vizioni dhe energjie.
“Sot ne themi Tirana është kryeqyteti i Evropës së Ballkanit, por në kohëra të tjera ka qenë Durrësi Evropa e Shqipërisë. Dhe është e pamundur për mua ta imagjinoj që qytetarët e Durrësit, ata që s’ja shohin dot ngjyrën PS, ata që flamuri i PS i bën të acarohen si demi kur sheh leckën e kuqe, duhet të shohin një ngjyrë tjetër, që na bashkon sot, që ka bashkuar flamurin kuq e zi me flamurin evropian, të shohin ngjyrën e detit që na lidh me Evropën që qëllon të jetë ngjyra e partisë së tyre,” u shpreh ai.
Më tej, Rama nuk kurseu ironinë ndaj opozitës, duke e cilësuar si “në koma” dhe liderin e saj si një “buf këneta”.
“Ajo është në koma, nuk jep, nuk merr. E për më tepër të mendosh që qytetarët durrsakë të mbeten peng pas një bufi kënete është trishtim,” deklaroi Kryeministri.
