Kryeministri Edi Rama ka ndarë një video këtë mëngjes nga samiti i NATO-s në Vilnius, Lituani ku thotë se i gjen aleatët më të fortë dhe më të vendosur për ruajtjen e paqes dhe sigurisë.
“Dhe me mesazhin e këtij viti të Samitit të Vilnius, Lituani që i gjen aleatët e NATO-s më të fortë e më të vendosur, për të mbrojtur lirinë dhe sigurinë e popujve tanë, ju uroj një ditë të mbarë”, shkruan Rama.
Më 11 dhe 12 korrik, udhëheqësit e shteteve anëtare të Organizatës së Traktatit të Atlantikut Verior (NATO) do të takohen në Vilnius, Lituani. Ata pritet t’i adresojnë sfidat më urgjente për aleancën, për të rritur kapacitetet mbrojtëse dhe parandaluese të NATO-s, si dhe për ta sjellë më afër grupit Ukrainën, sipas aleancës.
Shqipëria si vend anëtar i NATO-s ka dëshmuar përkushtimin dhe seriozitetin e saj, duke u shprehur hapa konkretë në rritjen e kontributit për ruajtjen e paqes dhe sigurisë. Më herët Rama tha se Shqipëria është e gatshme të angazhojë trupa shtesë për të forcuar praninë përpara të NATO-s.
