Kryeministri Edi Rama dhe kryeparlamentari Ilir Meta nuk e festuan 1 prillin, përvjetorin e koalicionit të tyre qeverisës, por zgjodhën datën 2 të së dielës për të hequr dyshimet mbi marrëdhënien e tyre të gënjeshtërt.
Ashtu si para 4 viteve, edhe këtë radhë, dy liderët politikë kanë dashur të komunikojnë për publikun një simbolikë të caktuar mbi raportet brenda koalicionit, duke zgjedhur “Pazarin e Ri” në kryeqytet për të darkuar së bashku.
Ora News shkruan se është arritur një marrëveshje e re mes PS dhe LSI për 4 vitet e ardhshme, duke konfirmuar koalicionin. Gjithashtu, është arritur marrëveshje dhe për presidentin e ri.
Takimi
Kreu i PS-së dhe kreu i LSI-së shoqëroheshin nga Erjon Veliaj dhe Petrit Vasili në një takim informal, në ambientet e një restoranti në zonën e Pazarit të Ri, në kryeqytet.
Biseda midis tyre zgjati rreth 4 orë. Rreth orës 1 të mëngjesit, i pari është larguar nga mjediset e restorantit kryetari i PS-së, Edi Rama, i shoqëruar nga Erjon Veliaj dhe, më pas, janë parë të largohen kreu i LSI-së, Ilir Meta dhe nënkryetari Petrit Vasili.
Ky takim i parë përfundoi pozitivisht, ndërsa nga dy partitë pritet që në ditët në vazhdim të përcaktojnë marrëveshjen e tyre të re. Më herët gjatë ditës së dielë, kryeministri Edi Rama ka kërkuar koalicion me LSI-në për vazhdimin e reformave, duke i lëshuar mesazhin më të fortë Ilir Metës se nuk ka ndërmend të presë dhe ulë shpejtësinë e Partisë Socialiste për marrjen e çdo vote. Rama paralajmëroi të gjithë ata që do investoheshin tek rrëzimi i tij dhe qeveria teknike, se do të dështonin.
Kreu i mazhorancës tha se nuk do ketë shtyrje të zgjedhjeve dhe tha se Partia Demokratike është e mirëpritur të vetëshkatërrohet.
