Në konferencën për mediat në Bruksel sot më 17 nëntor, ku Shqipëria çeli të gjitha grup-kapitujt për në Bashkimin Europian, u shtruan edhe pyetje nga gazetarët.
Një nga gazetarët pyeti nëse ka ndonjë pesimizëm në integrimin e Shqipërisë në BE.
Komisionerja për Zgjerimin Marta Kos tha se 90 përqind e shqiptarëve e duan vendin në BE dhe se edhe ajo pjesë e vogël pesimiste, është pozitive në kritikën që mund të ketë.
Ndërsa, kryeministri Edi Rama tha se Shqipëria ka punuar gjithmonë për integrimin në Bashkimin Europian. Ai shtoi se Tirana ka punuar për integrim në BE në kohët kur nuk kishte ardhmëri të qartë për BE e jo tashmë, që rruga evropiane, duket në horizont.
Marta Kos: Mesazhi për qytetarët shqiptarë është se ju jeni ata që duhet të keni sukses në rrugëtimin evropian. Njëkohësisht, është edhe përkushtimi i BE-së. Nuk është e vështirë të jesh pozitiv nga Shqipëria, sepse keni një udhëheqje të fortë. Te Rama keni udhëheqës që sheh nga e ardhmja. Harmonizimi i Shqipërisë me politikat e sigurisë me BE-në është 100 përqind. 90 përqind e qytetarëve e duan anëtarësimin në BE dhe ka pozitivitet për integrim. Shqipëri, vazhdo kështu!
Ministrja daneze: Shqipëria ka bërë përpara në reforma për të qenë pjesë e familjes europiane. Ka ende punë për të bërë, por jemi këtu për të ecur së bashku.
Edi Rama: Ka ende pyetje se a është real integrimi në BE apo do kemi periudhë si më parë. Është njësoj sikur shkon në shkollë e të thonë se nuk je aq i mirë dhe nis me këmbëngulje, do të fitosh në fund. Ajo që shqiptarët fitojnë nga ky proces është që fitohet një vend që funksionon me institucione me standarde të BE-së. Ne punonim fort dhe ishim skeptikë më herët. Por asgjë nuk duhet të na ndalë për të bërë realitet Shqipërinë në BE. Ne jemi besnikë ndaj perandorive. Kjo është e para perandori, me të cilën ne duam të jemi. Ne ishim pro Perandorisë Osmane dhe pro Bashkimit Sovjetik, por ishim me imponim dhe jo me zgjedhje. Këtë herë, jemi me zgjedhje e dëshirë të plotë.
