Disa dëgjues të radio stacionit komercial Mix Megapol në Suedi kanë dëgjuar rreth 30 minuta propagandë të Shtetit Islamik të premten, pasi hakerët ndërhynë në frekuencën e stacionit.
Incidenti është konfirmuar nga vetë pronarët e stacionit në fjalë. Mix Megapol është një nga stacionet më të mëdha të radiove me rreth 1.4 milion dëgjues në ditë, edhe pse ky problem preku vetëm dëgjuesit në qytetin jugor suedez të Malmos.
“Dikush ndërhyri në frekuencën tonë duke përdorur një transmetues pirat”, tha në një njoftim për shtyp Jakob Gravestam, Drejtor Marketingu në Bauer Media Group, i cili zotëron Mix Megapol.
“Ne do ta raportojmë incidentin në polici dhe në Agjencinë Kombëtare të Postës dhe Telekomit”, shtoi ai.
Kënga, me zëra meshkujsh që këndonin në anglisht, përmbante tekste si: “Për hir të Allahut në do të marshojmë në portat e parajsës, ku presin vajza të reja. Ne jemi njerëz që e duam vdekjen ashtu sic ju e doni jetën, ne jemi ushtarë që luftojnë ditën dhe natën”.
Moderatorët e emisionit të mëngjesit nuk e vunë re problemin, derisa dëgjuesit pyetën se çfarë po ndodhte.
“Shumë njerëz na kanë telefonuar. Jemi të lumtur që njerëzit janë vigjilentë dhe ne do e trajtomë me shumë seriozitet incidentin”, tha Gravestam./Tirana Today
