Qyteti bregdetar i Vlorës do të përballet me ndërprerje të furnizimit me ujë të pijshëm për një periudhë 24-orëshe, për shkak të punimeve që po kryhen në kuadër të projektit të ujësjellësit të ri të qytetit.
Sipas njoftimit zyrtar të shpërndarë nga Ujësjellës Kanalizime Rajoni Vlorë, ndërprerja do të nisë ditën e martë, më 27 maj, në orën 09:00 të mëngjesit, dhe do të zgjasë deri në mëngjesin e së mërkurës, 28 maj. Gjatë kësaj periudhe, do të stakohen tërësisht stacionet e pompimit të ujit.
Autoriteti lokal u kërkon qytetarëve mirëkuptim, duke theksuar se “ndërhyrja është e domosdoshme dhe pjesë e një projekti madhor që synon përmirësimin e furnizimit me ujë për të gjithë zonën urbane dhe periferike të Vlorës”.
“Ky kufizim është një hap i nevojshëm drejt një infrastrukture moderne dhe të qëndrueshme ujësjellësi”, thuhet në njoftimin e shpërndarë në rrjetet sociale nga UK Vlorë.
Banorët këshillohen të marrin masat e nevojshme për furnizimin me ujë gjatë kësaj periudhe ndërprerjeje.
