Qeveria e Spanjës ka marrë kontrollin direkt të Katalonjës duke shkarkuar qeverinë e saj separatiste, si dhe duke lajmëruar zgjedhje të parakohshme më 21 dhjetor në këtë rajon.
Lidhur me këtë veprim, ka folur kryeministri i Spanjës, Mariano Rajoy, mbrëmë vonë në Madrid.
“Një ditë më parë, presidenti i Katalonjës kishte rastin e fundit për ta kthyer gjendjen legale dhe t’i thërriste zgjedhjet, pasi kjo ishte ajo që shumica e madhe e popullit kishin kërkuar. Ai nuk donte ta bënte këtë, prandaj qeveria e Spanjës do të ndërmarrë masa për ripërtëritjen e ligjshmërisë”, tha kryeministri i Spanjës Rajoy.
Ndërkohë, Puigdemont ka kërkuar “kundërshtim demokratik” ndaj marrjes së kontrollit të Katalonjës nga ana e qeverisë qendrore në Madrid, pas shpalljes së deklaratës së pavarësisë së këtij rajoni.
Puigdemont tha për një televizion se aktivizimi i kapitullit 155 të Kushtetutës së Spanjës është jolegjitim dhe u ka bërë thirrje banorëve të Katalonjës të tregojnë “durim dhe këmbëngulje” dhe të kenë besim në të ardhmen.
Pas shpalljes së pavarësisë nga parlamenti i Katalonjës, mijëra persona dolën për të festuar në sheshin qendror në Barcelonë.
Ndërkohë, Gjermania dhe Britania nuk e kanë njohur pavarësinë e Katalanjës, ndërsa presidenti i KE, Donald Tusk u shpreh se për BE-në nuk kishte ndryshuar asgjë dhe se do kishte bashkëpunim vetëm me qeverinë e Spanjës.
