Andre Gomes gjatë një konference për shtypin spanjoll u shpreh se është duke kaluar një moment si në ferr tek Barcelona, aq sa i vjen turp që të dalë edhe nga shtëpia. Mesfushori tjetër Sergio Busquets ka folur në lidhje me deklaratat e spanjollit dhe është shprehur se nuk ishte në dijeni se situata kishte agravuar kaq shumë dhe se të gjithë janë munduar ta ndihmojnë me aq sa munden.
“Ne dimë diçka, por jo në këtë pikë, sepse është një çështje shumë personale. Ne kemi tentuar që ta ndihmojmë atë aq sa ka qenë e mundur, si një hobi ne duhet të bëjmë një hap përpara dhe të jemi më pozitivë. Sipas meje Andre është gati të luajë. Unë e shoh atë në stërvitje, duke punuar maksimalisht, pastaj ndodh ajo që nuk është e mirë për askënd dhe merr problemin me vete në shtëpi. Të gjithëve na ndodh. Kjo nuk i ka ndodhur vetëm atij, por të gjithëve”, deklaroi Busquets.
Mesfushori portugez, Andre Gomes, që prej transferimit nga Valencia tek Barcelona nuk është duke kaluar një formë të mirë. Ai është kritikuar gjithmonë dhe nuk ka arritur të zëri një vend në formacion, për më tepër ai është shprehur se gjithçka tek Barcelona për të është kthyer në ferr.
“Nuk ndjehem mirë në fushë. Unë nuk po e shijoj atë që po bëj. Gjashtë muajt e parë ishin mjaft të mirë, por pastaj gjërat ndryshuan. Ndoshta nuk është fjala e duhur për ta përdorur, por është kthyer në një ferr, sepse unë kam filluar ta ndjej më shumë presionin. Me presion ndjehem mirë, por me presion mbi vetveten, nuk mundem”.
“Ndjenja që kam gjatë lojës janë të këqija. Në stërvitje, jam i qetë. Ndihem rehat rreth shokëve të mi. Natyrisht, ka ditë që ndjehem pak i ulët në besim”, ka thënë Gomes për revistën Panenka. Për lojtarin ka interesim nga shumë klube si në Serie A ashtu edhe në Ligën Premier.
