Sali Berisha, kreu i Partisë Demokratike, i ka bërë një thirrje të drejtpërdrejtë kryeministrit Edi Rama për të zhvilluar një debat publik. Gjatë fjalës së tij në Vau i Dejës, Berisha e akuzoi Ramën për pasurim të paligjshëm dhe korrupsion, duke theksuar se ai ka pasur më shumë se 28 vjet në pushtet dhe ka ndërtuar saraje luksoze, ndërsa shqiptarët po vuajnë për shkak të keqqeverisjes.
Berisha u shpreh gjithashtu se ai është kthyer në politikë jo për interesa personale, por për një Shqipëri të begatshme dhe me një zhvillim më të madh për qytetarët e saj. Ai bëri thirrje për një debat të hapur për të diskutuar për programet dhe planet e Partisë Demokratike, duke e sfiduar Ramën të përballet në një debat.
Më tej, ai e përfundoi fjalën e tij me një mesazh optimist dhe ftoi qytetarët të votojnë për “njëshin”, simbolin e fitores, në zgjedhjet e 11 Majit.
Pjesë nga fjala e kreut të PD Sali Berisha në Vaun e Dejës:
Së fundmi miq, Edi Rama kontrollon të gjitha mjetet e propagandës.
Katër mediat i ka korruptuar me leje ndërtimi, i ka korruptuar në mënyra të ndryshme.
E thashë edhe më sipër, e them edhe këtu, Edi Rama, ke 28 vite në pushtet.
Pas 28 viteve në pushtet, je me saraje me themele më të gjata se Enver Hoxha.
Ai ka 720 metra themelet në sarajet e Surrelit, Hoxha i kishte 410 metra.
Enver Hoxha kishte një kopsht 2 mijë metër katrorë, Edi Rama ka një kopsht 8300 metra katrorë.
Unë u garantoj ju, unë kam një apartament 40 metra më të madh se atë që kisha në diktaturë.
Por, unë nuk mund të kisha më shumë pa marrë kredi.
Dhe kredi nuk doja të merrja. Nuk është se kjo rroga mjafton të ndërtosh saraje, për të mos thënë pallatin në pajë. Mori zonjë me pallat pesëkatësh pa asnjë faturë.
Edi Rama, ke qeverisur 12 vite, kam qenë kryeministër 8 vite. në ato 8 vite, shqiptarët lëvizën në gjithë Europën pa viza dhe kjo ishte arritja e jetës sepse tregu i vizave ishte tregu më i kushtueshëm.
Në ato 8 vite shqiptarët dyfishuan rroga dhe pensione. Ku janë sot pas 12 vitesh?
Në ato 8 vite Shqipëria u anëtarësua në NATO.
Në ato 8 vite u ndërtua TAP-i. TAP është një fat i bardhë për çdo shqiptar sepse kontrata parashikon gazifikimin e plotë të Shqipërisë.
Nuk kanë investuar një qindarkë. Ne do gazifikojmë Shqipërinë dhe vetëm me gazin do përmirësojmë kushtet e jetës së shqiptarëve.
Çfarë ka bërë ai 12 vite? Ka rrënuar shkollat, ka rrënuar spitalet, të sëmurët vdesin jo nga sëmundja, por nga mungesa e mjekimit. Ka zhdukur miliarda me pasuritë e tij.
Atëherë kthehemi prapë. Sali Berisha u kthye se ti dojë një Shqipëri pa opozitës.
Doje një Shqipëri në të cilën opozitën ta tërhiqje për hunde. Ta kontrolloje. Të ndihmuan edhe të tjerët. Po ja ku është populli opozitar, është populli i idealeve. Shqiptarët janë njerëz me ideale.
Dhe unë ua them ju këtu, nuk jam në politikë absolutisht kësaj radhe për asnjë interes personal.
Jo, jo. Nuk jam në politikë për interesa pasurie. Nuk jam në politikë për asnjë qëllim tjetër, përveçse misionit të Shqipërisë Madhështore.
Përveç bindjes time të thellë se shqiptarët në vendin e tyre duhet të begatohen më shumë, të kenë rroga të larta gjithnjë e më shumë, të kenë punësim gjithnjë e më shumë.
Këto janë qëllimet e misionit.
Por ta përfundojmë me një ftesë: hajde urdhëro nesër ose hajde këtu po deshe para këtyre burrave dhe grave, të bëjmë një debat. T’u themi shqiptarëve se çfarë do bëjmë ne dhe çfarë do bësh ti dhe jo të kopjosh programin që para 3 muajsh e quaje humnerë.
Nuk vjen dot, nuk mund të dalë se ka nga flokët tek këmbët vetëm mashtrime.
Prandaj dhe ne më 11 maj votojmë njishin, numrin hyjnor.
Votojmë njishin, numrin e diellit.
Votojmë njishin, numrin e fitores.
Rrofshi ju, rroftë Vau i Dejës. Rroftë Shqipëria.
Fitore, fitore, fitore!
