Punimet për zgjerimin e autostradës Tiranë-Durrës po vijojnë me ritme të shpejta. Aktualisht, mjetet që vijnë nga Durrësi drejt Tiranës janë devijuar në pjesën e zgjeruar të autostradës, ndërsa korsia aktuale po rehabilitohet.
“Në kantier janë realizuar rreth 50% të punimeve të të gjithë objektit. Është punuar me dy korsi të reja në të dy anët e rrugës. Në anën e majtë, në drejtim Durrës-Tiranë janë realizuar edhe shtresat asfaltike. Është devijuar trafiku i të gjithë mjeteve që vijnë nga Durrës në Tiranë në korsitë e reja, me qëllim vijimin e punimeve në korsinë ekzistuese. Po bëhen punime për mbushjen dhe shtresat e reja asfaltike. Në ditët në vijim edhe në krahun e djathtë do të nisin shtresat asfaltike në korsitë e reja që janë shtuar. Qarkullimi i mjeteve po vijon normalisht, është realizuar një sinjalistikë e përkohshme dhe trafiku vijon normalisht”, tha për ‘Vizion Plus” Adja Sefa, përgjegjëse, sektori i Menaxhimit të Projekteve, ARRSH.
Punimet po kryhen deri te mbikalimi i Rinasit dhe pritet të përfundojnë në dhjetor, ndërsa për lotet e tjera priten procedurat tenderuese.
“Punimet kanë nisur pas mbikalimit të Casa Italias dhe të dy fazat e deritanishme përshkojnë rreth 6 km deri në afërsi të mbikalimit të Rinasit. Edhe pse afati kontraktual është shtator 2026, pritet që punimet të mbyllen brenda këtij viti, duke parë ecurinë e kënaqshme deri tani. Gjatë këtij viti është parashikuar edhe faza e tretë, rehabilitimi i mbikalimit të Rinasit deri në nyjen lidhëse të mbikalimit të Kasharit. Edhe aty parashikohet të bëhen punimet brenda këtij viti, tenderi do të publikohet në ditët në vijim. Lotet e tjera janë parashikuar hap pas hapi në vitet në vijim”, u shpreh Adja Sefa.
Edhe rehabilitimi i rrugës së Ndroqit për lotin e parë po vazhdon me ritme të kënaqshme dhe punimet pritet të përfundojnë para afatit.
“Edhe për rrugën e vjetër të Ndroqit punimet kanë vijuar normalisht. Është punuar me formimin e trupit të rrugës në të gjithë gjatësinë të projektit, për 1 km ka përfunduar edhe shtresa asfaltike. Pritet që edhe aty punimet të përfundojnë brenda këtij viti. Punimet kanë filluar pas kombinatit, në një gjatësi rreth 5 km deri në shkollën Pezë-Helmës, në vitet në vijim janë parashikuar edhe fazat e tjera të rrugës. Pritet të përfundojnë brenda vitit 2025”, përfundoi Sefa.
Zgjerimi i autostradës Tiranë-Durrës dhe rehabilitimi i rrugës së vjetër të Ndroqit pritet t’i japë zgjidhje problemit të trafikut.
