Një gjykatës belg ka liruar liderin e Katalonjës, Carles Puigdemont dhe katër ministrat e tij me kusht që të paraqiten brenda 15 ditësh në gjykatë dhe të japin detaje për vendqëndrimet e tyre.
Puigdemont u dorëzua në policinë belge pas lëshimit të një urdhër arresti nga Spanja, për rebelimin dhe keqpërdorimin e fondeve publike.
Por, gjykatësi ka vendosur që t’i lirojë ata duke vendosur liri me kusht, pra ndalimin e largimit të Puigdemont dhe ministrave të tij nga Belgjika pa pëlqimin e gjyqtarit.
“Hapi tjetër në procedurë është paraqitja e pesë të pandehurve përpara Chambre du Conseil brenda 15 ditëve të ardhshme”, thanë prokurorët në një deklaratë.
Belgjika ka një maksimum prej 60 ditësh për t’i kthyer të pestë në Spanjë, por nëse nuk ka kundërshtime ligjore, një transferim i tyre mund të ndodhë shumë më shpejt.
