Dy ditë pas sulmit të dhunshëm ndaj 48-vjeçarit Adriatik Roshi, janë publikuar pamjet nga kamerat e sigurisë në berberhanën ku ndodhi ngjarja. Pamjet tregojnë momentin kur katër persona të maskuar futen me shpejtësi në një berberhanë në rrugën “29 Nëntori” dhe e dhunojnë brutalisht Roshin, ndërsa dy të tjerë qëndrojnë jashtë duke monitoruar situatën.
Të armatosur me armë zjarri, sëpatë dhe shkopinj, autorët kërkojnë shënjestrën e tyre brenda lokalit, e tërheqin jashtë dhe e godasin pa mëshirë. Ngjarja, e ndodhur më 5 janar, ka çuar në arrestimin e dy personave, ndërsa katër të tjerë janë shpallur në kërkim.
Të arrestuarit dhe të kërkuarit
Policia ka vënë në pranga 24-vjeçarin Gani Koçeku dhe 31-vjeçarin Ledio Tusha. Ndërkohë, në kërkim janë shpallur Luçiano Koçeku, i njohur si Tur Koçeku, Gëzim Koçeku, Ronald Koçeku dhe Dino (Abedin) Koçeku. Dyshohet se sulmi ndaj Roshit ka ndodhur për motive të dobëta, ndërsa ai është goditur me sende të forta.
Provat dhe hetimet
Gjatë operacionit, policia ka sekuestruar një pistoletë me leje në banesën e Ledio Tushës, një armë gjahu në banesën e Dino Koçekut, dy automjete të përdorura në ngjarje dhe veshje të cilat dyshohet se ishin përdorur nga autorët. Aktualisht, Adriatik Roshi ndodhet në spital nën kujdesin e mjekëve, ndërsa materialet për këtë rast i janë dorëzuar Prokurorisë për veprime të mëtejshme.
Pista e hakmarrjes
Hetuesit po shqyrtojnë pistën e një hakmarrjeje të mundshme, pasi ngjarja mund të lidhet me një sherr të ndodhur më 24 gusht 2024 në Palasë, ku Luçiano Koçeku ishte plagosur rëndë në një lokal nate. Megjithatë, ende nuk ka prova që Adriatik Roshi të ketë qenë pjesë e ngjarjes në Palasë.
Hetimet për këtë incident të rëndë vazhdojnë, ndërsa policia është e angazhuar për të kapur të dyshuarit që ndodhen ende në arrati.
