Analisti Ben Andoni ka komentuar arrestimin e kryebashkiakut të Tiranës, Erion Veliaj, duke e cilësuar si një zhvillim të rëndësishëm që do të tronditë skenën politike shqiptare.
Gjatë një interviste televizive, Andoni u shpreh se ky arrestim është një goditje e rëndë morale dhe një sinjal i qartë se drejtësia po vepron ndaj individëve me pushtet.
“Është një goditje shumë e madhe moralisht arrestimi i Veliajt. Sot të paktën opozita dhe PS duhet të tremben realisht nga drejtësia. Me këtë akt, duket qartë se drejtësia nuk do të ndalet me personat që kanë probleme ligjore. Shumë individë do ta kenë rrugën drejt SPAK-ut,” – u shpreh Andoni.
Sipas tij, politikanët që kanë pasur dyshime për korrupsion dhe abuzim me detyrën duhet të ndihen të rrezikuar, pasi SPAK duket i vendosur të vijojë me hetimet dhe ndëshkimet.
“Njerëz si Veliaj, me tagrin që kanë, e kanë shumë të vështirë për t’u hetuar, por ky zhvillim tregon se drejtësia po vepron,” – shtoi analisti.
Arrestimi i Veliajt ka shkaktuar reagime të shumta në skenën politike, ndërsa pritet që hetimet të thellohen dhe të sjellin të tjera zhvillime në ditët në vijim.
