Jo pak reagime u shkaktuan pas vendimit që FIFA dha ndaj dy lojtarëve shqiptarë, që aktivizohen me Zvicrën, për t’i dënuar ata me nga 10 mijë franga. Granit Xhaka dhe Xherdan Shaqiri u gjobitën me nga 10 mijë franga zvicerane, për festimin e golave respektivë ndaj Serbisë, me simbolin e shqiponjës. Rrjetet sociale dëshmuan se sa patriotë ishim, por ndryshe nga kjo valë ku shpalosej flamuri kuq e zi, jashtë turmës ka dalë komentatori i RTSH-së, Kostandin Grillo.
Sikundër duket qartë dhe në foton në fjalë, ai shihet nën shoqërinë e disa të rinjve, ku ajo që bie më shumë në sy është fakti se komentatori i RTSH-së ka bërë simbolin serb, pra tre gishta, ose siç njihet ndryshe si triniteti i shenjtë.
Komentatori sportiv ka provokuar rëndë, e ndërsa shqiptarët janë ende në euforinë e ndeshjes. Duket se ky gjest nuk është rastësor, pasi ai pak ditë më parë hapi diskutime të shumta në rrjet, pasi deklaroi se mbështeste Serbinë në këtë Botëror. Kjo foto është një “provokim” ndaj atyre që festuan me shqiponjën në duar.
Simboli i tre gishtave
Ky simbol u shfaq edhe të enjten, në ndeshjen Shqipëri-Serbi, ku pas fitores së Serbisë 2-0, futbollisti Zoran Tosic përshëndeti me tre gishta. E njëjta gjë u pa dhe në dhomat e zhveshjes së futbollistëve serbë. Megjithatë, tifozët Kuq e Zi nuk u provokuan dhe nuk shkaktuan incidente. Serbët revoltohen ndaj simbolit tonë, atë të të bërit të duarve në formën e shqiponjës.
Pak histori për tre gishtat
Një variant i interpretimit të këtij simboli, sipas serbëve, është triniteti i shenjtë. Por një shpjegim i tillë duket paska mitologjik, pasi ky simbol ka fituar popullaritet mes serbëve vetëm gjatë luftërave në Ballkan.
Përdorimi i parë i popullarizuar i përshëndetjes me tre-gishtat (me gishta të ndara) ishte në vitin 1988, kur serbët e përdorën për të kundërshtuar shqiptarët, kroatët dhe sllovenët. Gjesti i tre gishtave është një simbol ekskluziv serb, i cili në vitet e fundit ka marrë ngjyrime të forta nacionaliste, pasi u përdor në masë nga forcat paramilitare serbe në luftë, fillimisht kundër myslimanëve.
Sot përshëndetja përdoret nga anëtarët dhe mbështetës të pothuajse të gjitha partive politike serbe, në tubimet e tyre gjatë fushatave zgjedhore. Ajo mund të shihet në të gjitha llojet e demonstratave në rrugë dhe festime. Përshëndetja është përdorur shpesh nga tifozët dhe lojtarët kur festonin për fitoret e tyre.
