Protesta e opozitës ka nisur me përplasje fizike mes qytetarëve dhe forcave të policisë.
Ishin fillimisht, deputetët e Partisë Demokratike dhe disa mbështetës të PD që u konfrontuan me efektivët e vendosur rreth perimetrit të sigurisë të cilët kërkojnë lirimin e rrugës për mjetet.
Ndërkaq nga konfrontimi një protestues nuk është ndjerë mirë dhe i ka rënë të fikët para mburojave të policisë.
PO ashtu tek Bashkia e Tiranës policia nuk ka kursyer përfaqësuesit dhe deputetët e Partisë Demokratike, ku pre e sulmit fizik mësohet se ka rënë dhe Belind Këllicci.
Protesta e opozitës në Tiranë është shoqëruar me përplasje të forta mes mbështetësve të opozitës dhe uniformave të policisë.
Pas thirrjeve të shumta për lirimin e rrugës, policia përdori autobotin me ujë për të shpërndarë protestuesit që kishin bllokuar përpara bashkisë Tiranë.
Përplasje pati edhe në rrethrrotullimin e Sheshit Wilson, ku ndodhi një përplasje fizike mes deputetëve të Partisë Demokratike dhe efektivëve të policisë. “Mos më prek me dorë, ti si polic zbato ligjin”, dëgjohet të thotë deputeti Gazment Bardhi.
Situata agravoi më tej dhe kaloi në përplasje fizike, ku deputeti i PD-së, Bledion Nallbati, i shoqëruar nga Eno Bozdo u përfshinë në një konfrontim fizik me efektivët e policisë, të cilët kishin hyrë në mesin e protestuesve, ndërsa është gjakosur deputeti Bledion Nallbati.
Ndërkaq përfaqësuesit e Partisë së Lirisë të kryesuar nga zëvendëspresidentja Erisa Xhixho dhe Sekretari i Përgjithshëm Tedi Blushi, do të uleshin këmbëkryq në rrugë.
“Hajde guxoni të na shkelni”, iu drejtua Xhixho efektivëve që i kishin rrethuar mbi kokat e tyre.
Për “Ora News” anëtari i Kryesisë së PD-së Ivi Kaso deklaroi se me t’u mbullur protesta do të shkohet në Drejhtorinë e Policisë së Tiranës për të mësuar se kush urdhëroi dhunimin e qytetarëve pa asnjë arsye dhe pa nisur akoma tubimi.
“Do të njihemi menjëherë sapo të mbarojë tubimi, ku përfaqësuesit dhe avokatët tanë të shkojnë në komisariate për të bërë të pamundurën lirimin e qytetarëve të arrestuar pa asnjë akuzë, pasi nëse ka pasur ndonjë subjekt që ka ushtruar dhunë ka qenë Policia e Shtetit”, tha Kaso.
