Kreu i PD-së, Sali Berisha, njoftoi se protesta e radhës e opozitës do të mbahet në datën 8 shkurt në kryeqytet.
Analisti Frrok Çupi e cilësoi këtë protestë si një veprim që do t’i rrisë vlerën mazhorancës, duke theksuar se nuk ka pasur asnjë reagim nga Evropa. Ai u shpreh se protesta është organizuar për interesa personale të Berishës dhe kundër drejtësisë, duke theksuar se nuk ka asnjë lidhje me nevojat e popullit.
Çupi vlerësoi se protesta e Berishës dhe të tilla ngjarje janë të dëmshme për imazhin e vendit dhe krijojnë një perceptim negativ. Sipas tij, çdo protestë që përdor dhunën dhe përshkallëzon tensionet, vetëm sa e forcën mazhorancën dhe i jep mundësi për t’u afirmuar më shumë. Ai gjithashtu theksoi se Evropa nuk është shqetësuar nga këto veprime, duke theksuar se, përkundrazi, protestat e tilla po krijojnë më shumë presion ndaj Berishës dhe e ndihmojnë që të humbasë mbështetje.
Çupi po ashtu theksoi se protestat janë të shëndetshme kur janë të qeta dhe kanë qëllime pozitive, por protesta e Berishës është për të mbrojtur interesat e tij personale, duke u shmangur nga çështjet e drejtësisë që ai duhet të përballet me to, përfshirë gjyqin më 30 janar dhe ftesat e tjera që ka nga SPAK.
“Këtu kemi jetuar periudha miqësie dhe armiqësie, kur kemi përjetuar miqësinë me kinezët që kanë qenë pak a shumë si Saliu. Realisht bota bën vija paralele me politikat demode, janë politika demode që u ka ikur koha dhe sa më shumë protesta të bëjnë, humbet autoriteti, vlera, prestigji dhe humbet votues.
Është një gjë që nuk ka dhënë kurrë rezultat, ka krijuar imazhin më të keq për vendin. Askush nuk e do më këtë gjë dhe nuk e pranon të shohi sërish. Ka ndryshuar vendi dhe shoqëria, nuk është më Shqipëria e Saliut, nuk është më aq e prapambetur. Madje kam përshtypjen që nuk njohin vendin sepse askush nuk lejon t’i djegësh më pronën, vendin.
Sa më shumë bëhen protesta të dhunshme, aq më shumë dy elementë zhvillohen. Rritet mazhoranca dhe përqëndrohet rreth vlerës që ka mazhoranca. E dyta, ka ndonjë reagim nga Evropa, nuk ka asnjë. Protestat janë të shëndetshme dhe janë manifestime politike, janë dhe të bukura nuk janë egërsira dhe shëmtim.
Këta vetë e dijnë këtë gjë dhe protestën e kanë kundër drejtësisë dhe për të mbrojtur Sali Berishën. Ka datën 30 që do të shkojë në gjyq dhe nuk e thotë. Ka data të tjera që do thërritet në SPAK për 21 janarin”, tha Çupi.
