Juristi Kreshnik Spahiu ka komentuar kandidaturat për deputetë në Partinë Socialiste, duke reaguar ndaj deklaratës së Kryeministrit Edi Rama se shumica e grupit parlamentar do të kandidojë në lista të hapura.
Spahiu shprehu kritikën e tij duke thënë me ironi se shumë të sapodiplomuar po tentojnë të bëhen deputetë për 24 orë, pa pasur asnjë kontribut të mëparshëm. Ai gjithashtu theksoi se në vend të promovimit të individëve të rinj dhe të aftë, po promovohen persona anonimë që nuk kanë asnjë lidhje me realitetin shqiptar.
“Unë mendoj se të dy grupet, qoftë të Berishës me xhaketa të vjetra, këta kanë humbur sensin e masës, balancës. Këta kanë një botë paralele të tyre që është krejt e papërshtatshëm për realitetin shqiptar,” tha Spahiu, duke shtuar se është kundër promovimit të individëve anonime në lista dhe të atyre që nuk kanë pasur asnjë angazhim të dukshëm.
