Prokuroria pranë Gjykatës së Shkallës së Parë të Juridiksionit të Përgjithshëm Fier ka përfunduar hetimet dhe ka dërguar në gjyq dy drejtoreshat e Bashkisë Fier dhe drejtorin e Drejtorisë Vendore të Kontrollit Tatimor (DVKT) Rajoni Jugor, të akuzuar për shpërdorim detyre dhe ushtrim të ndikimit të paligjshëm.
Shtetasja A.H., në cilësinë e Drejtoreshës së Përgjithshme të Taksave dhe Urbanistikës në Bashkinë Fier, akuzohet se nuk ka marrë masat për vendosjen e kasës fiskale në sistemin e parkimit të Bashkisë, duke lejuar shmangien nga pagimi i detyrimeve tatimore në vlera të konsiderueshme. Hetimet tregojnë gjithashtu se A.H. ka ushtruar ndikim të paligjshëm mbi drejtoritë në varësi, duke realizuar faturime fiktive të subjekteve dhe duke i taksuar ato në vlera më të ulëta.
Gjithashtu, A.H. ka influencuar Drejtoresha e Taksave në Bashkinë Fier, A.C., për të kryer përllogaritje të parregullta të taksave për subjektin “R…” shpk, duke lëshuar vërtetim se ky subjekt nuk kishte detyrime, ndonëse kishte tatime të papaguara në vlera të konsiderueshme.
Shtetasja A.C., Drejtoreshë e Taksave dhe Tarifave Vendore në Bashkinë Fier, akuzohet se ka lëshuar dhe konceptuar fatura tatimore mbi vlerën reale për disa subjekte. Pasi subjekteve u janë njoftuar faturat, ato janë ndryshuar pas ankesave, ndonjëherë edhe duke u ulur më shumë se sa parashikonte vendimi i Këshillit Bashkiak. A.C. ka realizuar gjithashtu faturime fiktive dhe nuk ka marrë asnjë masë për fiskalizimin e pikave të parkimit të mjeteve në administrimin e Bashkisë.
Ndërkaq, shtetasi V.Ç., Drejtor i DVKT Rajoni Jugor, akuzohet se ka dhënë urdhër për të kryer kontroll në një subjekt tregtar pa autorizim nga DPT. Pas kryerjes së kontrollit, ai nuk ka ndjekur procedurat ligjore për të kërkuar rikontroll në Drejtorinë e Përgjithshme të Tatimeve dhe nuk ka mbikëqyrur fushatën sensibilizuese, pasi nuk është kontrolluar asnjë subjekt tjetër.
Në përfundim, Prokuroria e Fierit ka dërguar çështjen në gjyq, duke i akuzuar:
A.H. për kryerjen e veprave penale “Shpërdorimi i detyrës” dhe “Ushtrimi i ndikimit të paligjshëm ndaj personave që ushtrojnë funksione publike”;
A.C. për kryerjen e veprës penale “Shpërdorimi i detyrës”;
V.Ç. për kryerjen e veprës penale “Shpërdorimi i detyrës”.
Prokuroria thekson se çdo person prezumohet i pafajshëm deri në vërtetimin e fajësisë me vendim gjyqësor të formës së prerë dhe riafirmon angazhimin e saj për të vënë para përgjegjësisë ligjore çdo punonjës shtetëror ose në shërbim publik që kryen veprime penale kundër veprimtarisë shtetërore.
