Kolegji i Posaçëm i Apelimit (KPA) ka lënë sot në fuqi vendimin e Komisionit të Pavarur të Kualifikimit (KPK) ndaj gjyqtares Shefkie Mataj (Demiraj).
Trupi gjykues i KPA, i përbërë nga Sokol Çomo kryesues; Ina Rama relatore, Albana Shtylla, Mimoza Tasi, Rezarta Schuetz – anëtare, në përfundim të gjykimit në dhomë këshillimi, la në fuqi vendimin e Komisionit të Pavarur të Kualifikimit (KPK) të marrë më 28 shtator 2022 për shkarkimin nga detyra të gjyqtares së Tiranës.
Ky vendim është përfundimtar dhe ka efekt të menjëhershëm.
Shefkie Demiraj e ka nisur karrierën në sistemin e drejtësisë në vitin 1992 dhe ka punuar për më shumë se një dekadë në Gjykatën e Rrethit Tropojë. Prej vitit 2006, Demiraj ushtronte funksionin në Gjykatën e Rrethit Gjyqësor Tiranë.
Në vitin 2022 Komisioni i Pavarur i Kualifikimit vendosi të shkarkojë nga detyra gjyqtaren Demiraj për kriterin e pasurisë.
