Kolegji i Posaçëm i Apelimit ka lënë në fuqi vendimin e Komisionit të Pavarur të Kualifikimit (KPK) për shkarkimin e gjyqtarit Ken Dhima nga Gjykata Administrative e Vlorës.
Trupi gjykues, i përbërë nga gjyqtaret Ina Rama (kryesuese), Albana Shtylla (relatore), Mimoza Tasi, Natasha Mulaj dhe Rezarta Schuetz, shpalli vendimin për çështjen nr. 74/2021, duke vendosur unanimesh që të mos ndryshonte vendimin e KPK-së të datës 29 korrik 2021.
Shkarkimi i Dhimës ishte për shkak të problemeve në kriterin e pasurisë. Gjyqtari Dhima ka filluar karrierën e tij në vitin 2003 në Gjykatën e Rrethit Gjyqësor Durrës dhe më pas është transferuar në Shkodër dhe Vlorë, ku ka shërbyer deri në momentin e shkarkimit. Ky vendim është përfundimtar dhe ka efekt të menjëhershëm.
‘Në përfundim të gjykimit, trupi gjykues, bazuar në nenin 66, pika 1, shkronja “a” e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi: Lënien në fuqi të vendimit nr. 428, datë 29.07.2021, të Komisionit të Pavarur të Kualifikimit që i përket subjektit të rivlerësimit Ken Dhima. Ky vendim është përfundimtar dhe ka efekt të menjëhershëm’, thuhet në njoftim.
