Menaxherët e dy lokaleve në Sarandë po hetohen në gjendje të lirë pasi vendosnin muzikë të lartë në këto ambiente, duke shqetësuar qytetarët e pushuesit.
Policia bën me dije se janë referuar materialet në Prokurori ku ka nisur procedimi në gjendje të lirë për menaxherët e 2 lokaleve, shtetasit me iniciale F. F., 38 vjeç, banues në Tiranë dhe R. Z., 41 vjeç, banues në Sarandë.
Njoftimi i policisë:
Sarandë/Konstatohen si rezultat i patrullimeve gjatë natës, dhe goditen 2 raste të tjera të ndotjes akustike.
Procedohen penalisht menaxherët e 2 lokaleve në qytet dhe në bregdet, të cilët duke vënë muzikë të lartë në këto ambiente, ishin bërë shqetësim për qytetarët dhe për pushuesit. Sekuestrohen pajisjet që gjeneronin muzikën.
Si rezultat i kontrolleve të kryera gjatë mbrëmjes dhe gjatë natës, nga shërbimet e Komisariatit të Policisë Sarandë, në subjekte të ndryshme në zonën urbane dhe në atë bregdetare, për të verifikuar zbatimin e ligjit mbi orarin dhe nivelin e muzikës, janë konstatuar dhe goditur 2 raste të tjera të paligjshmërive në këtë fushë.
