Në qytetin Cereté të Kolumbisë, një vajzë e porsalindur është regjistruar zyrtarisht me emrin Chat Yipiti, një zgjedhje e pazakontë e frymëzuar nga platforma e inteligjencës artificiale ChatGPT.
Lajmi ka nxitur reagime të shumta në rrjetet sociale dhe komunitetin lokal: disa e kanë përshëndetur si një akt origjinaliteti, ndërsa të tjerë e kanë parë me humor.
Ngjarja ndodhi më 15 gusht 2025 në Zyrën e Gjendjes Civile në Cereté, kur vajza u regjistrua me emrin e plotë Chat Yipiti Bastidas Guerra. Sipas mediave lokale, prindërit e saj shpjeguan se ky emër është një “homazh për epokën e inteligjencës artificiale” dhe lidhet drejtpërdrejt me ChatGPT, modelin e zhvilluar nga OpenAI, i cili është bërë një nga më të përdorurit në botë
Edhe pse raste të emrave të pazakontë nuk janë të reja në Kolumbi, fakti që lidhet me një teknologji kaq të re ka hapur debat mbi lirinë e prindërve për të zgjedhur emrat e fëmijëve dhe kufijtë që duhen vendosur nga normat shoqërore ose kulturore.
Në rrjete sociale, shumë përdorues kanë shprehur shqetësim për pasojat që ky emër mund të ketë për vajzën në të ardhmen. Kolumbia ka një histori të gjatë me emra të pazakontë të frymëzuar nga sporti, filmat apo këngëtarët, si “Maicol Yordan” apo “Brayan Spears”.
