Duka i Sussex, Princ Harry, ka bërë një vizitë të papritur në Ukrainë, ku shprehu synimin për të bërë “gjithçka të mundur” për rehabilitimin e ushtarakëve të plagosur.
Harry udhëtoi drejt Kievit me ekipin e “Fondacionit Invictus Games”, pas një ftese nga qeveria ukrainase, dhe pritet të paraqesë plane të reja për ndihmën ndaj të plagosurve. Për arsye sigurie, detajet e axhendës së tij nuk janë bërë të ditura.
Vizita vjen pasi princi kaloi disa ditë në Britaninë e Madhe, ku u takua me të atin, mbretin Charles për herë të parë pas më shumë se një viti.
“Ne nuk mund ta ndalim luftën, por mund të bëjmë gjithçka që të ndihmojmë procesin e rimëkëmbjes”, tha Harry . Ai theksoi se vizita synon të mbajë gjallë kujtesën për vuajtjet e njerëzve të prekur nga lufta.
Duka u ftua fillimisht nga drejtuesja e Qendrës së Traumës “Superhumans” në Lviv, që trajton ushtarakët e pëagpsur. Pas një takimi të rastësishëm me të në SHBA, ai vendosi të udhëtonte në Kiev me miratimin e bashkëshortes dhe qeverisë britanike.
Ndërkohë, fondacioni bamirës i çiftit, “Archewell”, njoftoi një donacion prej 500 mijë dollarësh për projekte që ndihmojnë fëmijët e plagosur nga lufta në Gaza dhe Ukrainë, përfshirë evakuime mjekësore dhe zhvillimin e protezave.
Në Kiev, princi do të vizitojë Muzeun Kombëtar të Historisë së Ukrainës në Luftën e Dytë Botërore dhe do të takohet me 200 veteranë si edhe me kryeministren ukrainase, Yulia Svyrydenko.
