Kreu i Partisë Demokratike, Sali Berisha, ka njoftuar se kandidatët për deputetë në zgjedhjet e ardhshme do të zgjidhen përmes primareve, një proces që sipas tij synon përfshirjen direkte të demokratëve në vendimmarrje. Megjithatë, ky vendim ka ngjallur debat dhe kritika të ashpra brenda PD-së.
Ish-deputeti i PD-së, Azgan Haklaj, ka deklaruar se primaret e shpallura nga Berisha janë një manovër politike për të eliminuar rivalët brenda partisë, veçanërisht grupin e drejtuar nga Gazment Bardhi, në mënyrë që të vendosë vajzën e tij. Në një intervistë, Haklaj e akuzoi Berishën se po tenton ta shndërrojë PD-në në një “bunker” kundër SHBA-së dhe se po ndjek një strategji për të forcuar kontrollin e tij mbi partinë.
Haklaj e konsideroi këtë qasje si një përpjekje për të thelluar ndasitë brenda PD-së dhe për të eliminuar zërat kritikë. Ai shtoi se primaret synojnë të favorizojnë kandidatë të afërt me Berishën dhe se ky proces ka të bëjë më shumë me interesa personale dhe të grupeve të caktuara sesa me përfshirjen e anëtarësisë.
“Berisha po e përdor procesin e primareve për të konsoliduar pushtetin e tij personal. Kjo është një goditje e drejtpërdrejtë ndaj grupit të Bardhit dhe një përpjekje për të krijuar një parti që shkon kundër interesave të SHBA-së. Marrëdhëniet e tij të fshehta me Ramën janë tashmë të qarta,” tha Haklaj.
Ai gjithashtu ngriti dyshime mbi përpjekjet për të përfshirë diasporën në procesin zgjedhor, duke aluduar se ka mundësi për manipulime dhe pengesa të qëllimshme për të kufizuar votimin nga jashtë.
“Berisha dhe Rama do të gjejnë mënyra për të kontrolluar procesin dhe për të shmangur ndikimin e diasporës në zgjedhje, sidomos nëse ajo regjistrohet në numër të madh dhe përtej pritshmërive të tyre,” përfundoi Haklaj.
