Presidenti kroate, Kolinda Grabar-Kitarovic vazhdon të tregojë se ajo është një tifoze e zjarrtë e futbollit. Në takimin me NATO në Bruksel ajo iu ka dhuruar liderëve botërorë fanellën e ekipit të vetë kombëtar me emra të personalizuar. Kjo si pasojë e suksesit që ka arritur Kroacia duke shkuar në gjysmëfinalet e Botërorit dhe ka shansin të shkruaj historinë duke prekur finalen e madhe.
Presidenti i SHBA, Donald Trump ishte një ndër të përzgjedhurit e presidentes kroate dhe duket se ai e ka mirëpritur me shumë kënaqësi, duke i dhuruar edhe një buzëqeshje të parës së shtetit kroat.
Kitarovic nuk u ndal me kaq, një fanellë të tillë ia dhuroi edhe kryeministres britanike, Theresa May, e cila e pranoi me një buzëqeshja të thartë.
Kolinda, që ka ndjekur dy ndeshjet e mëparshme të Kroacisë në Kupën e Botës në futboll, nuk do të jetë në gjendje të shikojë ndeshjen gjysmëfinale sonte, sepse do të jetë në një darkë pune me përfaqësues të anëtarëve të NATO-s.
Theksojmë se Kroacia do të takohet sonte në Luzhniki Stadium me kombëtaren e Anglisë në kuadër të gjysmëfinales së botërorit. Franca është ekipi finalist i parë dhe sonte do të mësoje edhe kundërshtarin me të cilin do të përballet më 15 korrik.
