Presidenti rus Vladimir Putin ka deklaruar se ka arritur “mirëkuptim” me Presidentin e SHBA-së Donald Trump mbi përfundimin e luftës në Ukrainë, në takimin e tyre në Alaska muajin e kaluar.
Por ai nuk tha nëse do të pranonte bisedime paqeje me Presidentin ukrainas Volodymyr Zelensky të ndërmjetësuara nga Trump, i cili me sa duket kishte dhënë të hënën si afat për përgjigjen e Putinit.
Duke folur gjatë një samiti në Kinë, Putin vazhdoi të mbronte vendimin e tij për të pushtuar Ukrainën, duke fajësuar përsëri Perëndimin për luftën.
Pas takimit në Alaskë , i dërguari special i SHBA-së, Steve Witkoff, tha se Putini kishte rënë dakord për garanci sigurie për Ukrainën si pjesë e një marrëveshjeje të mundshme paqeje në të ardhmen, megjithëse Moska ende nuk e ka konfirmuar këtë.
Putini po fliste në Tianjin në samitin e Organizatës së Bashkëpunimit të Shangait, ku u takua me Xi Jinping dhe Narendra Modi.
Ai falënderoi udhëheqësit kinezë dhe indianë për mbështetjen dhe përpjekjet e tyre për të “lehtësuar zgjidhjen e krizës ukrainase”.
Kina dhe India janë blerësit më të mëdhenj të naftës bruto ruse, duke tërhequr kritika nga Perëndimi se po mbështesin ekonominë ruse e cila është goditur nga përpjekjet e luftës.
Në fjalimin e tij, Putin deklaroi gjithashtu se “mirëkuptimet e arritura gjatë takimit me Trump në Alaska shpresojmë që, duke lëvizur në këtë drejtim, hapin rrugën për paqe në Ukrainë”.
Në të njëjtën kohë, ai përsëriti pikëpamjen e tij se “kjo krizë nuk u shkaktua nga sulmi rus ndaj Ukrainës, por ishte rezultat i një grushti shteti në Ukrainë, i mbështetur dhe i provokuar nga Perëndimi”.
Ai gjithashtu ia atribuoi luftën “përpjekjeve të vazhdueshme të Perëndimit për të tërhequr Ukrainën në NATO”.
Presidenti rus gjithmonë e ka kundërshtuar idenë e Ukrainës që t’i bashkohet aleancës ushtarake perëndimore.
Në vitin 2014, Putin pushtoi Krimenë dhe aleatët e tij rusë morën pjesë të Ukrainës lindore. Vite më vonë, në shkurt 2022, Putin urdhëroi pushtimin e plotë të Ukrainës nga Rusia.
Komentet e fundit të Putinit vijnë vetëm disa ditë pasi Rusia nisi sulmin e saj të dytë më të madh ajror kundër Ukrainës në luftë.
Të premten, presidenti francez Emmanuel Macron tha se ‘’Putin do të duhej të përmbushte afatin e së hënës të Trump për të rënë dakord për bisedime paqeje me Zelenskyn’’.
