Llakatundi, një nga fshatrat më të mëdhenj në sipërfaqe të Bashkisë Vlorë, pjesë e njësisë administrative të Shushicës është lënë plotësisht në harresë. Ndodhemi në fshatin Llakatund, vetëm 20 km larg qytetit bregdetar. Kjo është rruga që të çon për në qendër të fshatit, siç e shikoni dhe nga pamjet pas meje, është komplet e shkatërruar. Banorët që kanë mbetur në fshat tregojnë se rrugët në dimër janë të pakalueshme dhe se bashkia nuk ka vënë dorë kurrë në këtë zonë.
“Ne rrugë s’kemi asgjë s’kemi, një shi bie gërryhet komplet xhadeja. Asnjëherë nuk është rregulluar, prej shumë vitesh, të bjeri një shi atje s’ke ku kalon, do çizme”, thotë një banor. “Ka nja 6-7 vjet kështu, kjo rrugë është bërë nja tre herë që the ti, me cilësi të dobët kuptohet, ka nja 3 vjet që është në këtë gjendje”, shprehet një tjetër.
Përveç amortizimit të rrugëve, mungon edhe ndriçimi dhe si rrjeti hidrik në fshat. Banorët kanë përshtatur puse, të cilat nuk garanton siguri në shëndet. “Pa ndriçim jemi, nuk ka ndriçim, vetëm këtu ka (në qendër të fshatit), të dalësh natën në rrugë, nuk ka ndriçim”, thotë një banore e fshatit. Situata ka qenë dhe vijon të jetë e vështirë në fshatin Llakatund, ku problemet janë të mbartura ndër vite dhe vazhdimisht kërkohet vëmendje nga bashkia dhe njësia administrative Shushicë, por që ka munguar dhe vijon të mungojë.
