Zyra e Prokurorit të Përgjithshëm polak ka kërkuar që ish-ministri i Drejtësisë, Zbigniew Ziobro të merret nën hetim në lidhje me akuzat për korrupsion.
Parlamenti polak hapi rrugën për hetimet një javë më parë duke hequr imunitetin e Ziobro si ligjvënës i opozitës.
Nga viti 2015 deri në vitin 2023, Ziobro ishte ministër i Drejtësisë në qeverinë nacionaliste konservatore – të udhëhequr nga partia e krahut të djathtë Ligj dhe Drejtësi (PiS).
Prokurori publik dhe qeveria e re liberale e udhëhequr nga ish-presidenti i Këshillit të BE-së, Donald Tusk, e akuzojnë atë për korrupsion dhe shpërdorim detyre.
Në mënyrë specifike, janë gjithsej 26 vepra penale, duke përfshirë dyshimin për themelim dhe anëtarësim në një organizatë kriminale dhe dyshimin për përvetësim të ekuivalentit të 35 milionë eurove (40 milionë dollarë).
Sipas hetuesve, 55-vjeçari përballet me deri në 25 vjet burg nëse dënohet.
Ish-ministri i ka mohuar akuzat, duke i quajtur ato “të rreme dhe të sajuara” dhe foli për një “fazë tjetër hakmarrjeje” nga kryeministri.
Megjithatë, Ziobro nuk do të shkojë direkt në burg për momentin. Ai ndodhet aktualisht në Hungari dhe është takuar edhe me kryeministrin Viktor Orban.
Dhjetorin e kaluar, ish-zëvendësi i Ziobro, Marcin Romanowski, i cili kërkohet gjithashtu nga zyra e prokurorit publik, u largua në Hungari dhe iu dha azil politik.
Pritet që Ziobro të ndjekë këtë shembull për të shmangur ndjekjen penale
