Pas disa operacioneve të suksesshme kundër trafikut të armëve, Drejtori i Përgjithshëm i Policisë së Shtetit, Ilir Proda, ka deklaruar se angazhimi i strukturave të rendit është maksimal për garantimin e sigurisë në çdo cep të vendit.
Duke iu referuar veçanërisht operacionit të fundit të Policisë së Kukësit, në bashkëpunim me Policinë e Kosovës, ku u sekuestruan tetë armë zjarri dhe u arrestuan dy shtetas kosovarë, Proda vlerësoi punën e oficerëve të patrullës, njësisë “Shqiponja” dhe hetuesve të krimit, duke theksuar se “çdo armë e ndaluar është një jetë e shpëtuar”.
Ai shtoi se bashkëpunimi me partnerët rajonalë po jep rezultate të prekshme në luftën kundër trafikut të armëve dhe krimit të organizuar. Proda u shpreh se armët e paligjshme janë burimi kryesor i ngjarjeve kriminale dhe një kërcënim i përhershëm për sigurinë publike.
“Çdo rrjet i çmontuar është një krim i parandaluar. Policia e Shtetit është më e angazhuar se kurrë në veprime parandaluese, hetimore dhe operacionale, brenda dhe jashtë vendit,” – deklaroi ai.
Drejtori i Policisë bëri thirrje për bashkëpunim të ngushtë me qytetarët, shoqërinë civile dhe median, duke theksuar se siguria nuk negociohet dhe se besimi ndaj Policisë është çelësi i suksesit në këtë përballje të përditshme me krimin.
