Një automjet u përfshi nga flakët në orët e para të mëngjesit të ditës së sotme, në qytetin e Pogradecit. Mësohet se mjeti ka qenë i parkuar në lagjen Nr.2 të qytetit, në momentin e shpërthimit, rreth orës 03:00.
Policia ka mbërritur në vendin e ngjarjes dhe pas këqyrjes paraprake dyshon se mjetit tip Citroen, me targa PG 6433 B, i është vendosur një sasi lënde shpërthyese.
Mjeti është në pronësi të shtetasit me inicialet P.N., 32 vjeç. Shpërthimi ka qenë i fuqishëm, aq sa janë thyer xhamat e disa ndërtesave në afërsi të tij, por fatmirësisht pa shkaktuar dëme në njerëz.
Policia thotë se po punon për zbardhjen e ngjarjes dhe identifikimin e autorëve të mundshëm të vendosjes së lëndës shpërthyese.
