Dy të miturit akuzohen për armëmbajtje pa leje, dhunim i varreve të kryer në bashkëpunim dhe mbajtje pa leje e armëve të ftohta.
Policia e Pogradecit ka zbardhur ngjarjen e muajit maj 2025, ku drejt banesës së 42-vjeçarit u qëllua me breshëri arme.
Për këtë ngjarje, blutë kanë arrestuar dy adoleshentë, M.K. dhe J.H., të dy 16 vjeç, ndërsa është sekuestruar arma e zjarrit kallashnikov, fishekë e doreza metalike.
Adoleshentët, armën e kishin fshehur në një varr në varrezat e qytetit të Pogradecit. Ndërsa në banesën e njërit prej të arrestuarve, policia gjeti 1 dorezë metalike, një sasi municioni luftarak dhe një gëzhojë arme zjarri model 56.
Dy të miturit akuzohen për armëmbajtje pa leje, dhunim i varreve të kryer në bashkëpunim dhe mbajtje pa leje e armëve të ftohta.
Njoftimi i Policisë Pogradec:
Qëlluan me armë zjarri në drejtim të banesës së një 42-vjeçari, në Pogradec, Policia identifikon dhe arreston dy 16-vjecarë.
Policia gjen armën e zjarrit kallashnikov që ata e mbanin të fshehur në varrezat e qytetit, municion luftarak dhe një dorezë metalike.
Njëri nga 16-vjeçarët, i proceduar penalisht më parë, për plagosje me thikë.
Në vijim të punës së pandërprerë për zbardhjen e ngjarjeve të ndodhura më parë, falë edhe bashkëpunimit me qytetarët, shërbimet e Komisariatit të Policisë Pogradec kanë siguruar informacion për dy shtetas të mitur që mbanin armë zjarri dhe dyshohet se kishin qëlluar në drejtim të një banese, në muajin maj 2025, kanë organizuar punën për dokumentimin ligjor të këtij rasti.
Mbi bazën e këtyre informacioneve, specialistët e Seksionit për Hetimin e Krimeve të Komisariatit të Policisë Pogradec, në bashkëpunim me shërbimet e Patrullës së Përgjithshme, kapën dhe vunë në pranga shtetasit M. K. dhe J. H., të dy 16 vjeç, banues në Pogradec.
Gjatë kontrollit në banesën e shtetasit M. K., në lagjen nr. 1, u gjetën 1 dorezë metalike (përforcues grushti), një sasi municioni luftarak dhe një gëzhojë arme zjarri model 56.
Nga veprimet hetimore dyshohet se këta shtetas posedonin një armë zjarri automatik, të cilën e mbanin të fshehur në një varr në varrezat e qytetit të Pogradecit. Gjithashtu, nga hetimet u bë e mundur zbardhja dhe dokumentimi i ngjarjes së ndodhur më datë 11.05.2025, në lagjen nr. 1, Pogradec, ku është qëlluar me armë zjarri në drejtim të banesës së një 42-vjeçari.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprat penale “Mbajtja pa leje dhe prodhimi i armëve, armëve shpërthyese dhe municionit”, “Dhunimi i varreve”, të kryera në bashkëpunim, dhe “Mbajtja pa leje e armëve të ftohta”.
