Më 14 janar 2025 emisioni “Stop” në Tv Klan transmetoi problemin e qytetarit Aleko Dalla nga Durrësi, i cili tregonte se në vitin 2024 i kishin prezantuar Elton Jahon. Ky i fundit kishte thënë se punonte në Ministrinë e Bujqësisë dhe kërkonte të investonte në një stallë sipas një fondi që jepte Bashkimi Evropian. Fondi ishte 420 milionë lekë të vjetra dhe Elton Jaho do të merrte 25% të shumës. Premtoi se do të legalizonte tokën për të cilën mori 1 milionë e 500 mijë lekë.
Më pas nxori një problem me tokën dhe kërkoi edhe 1 milionë e 300 mijë lekë. Çdo gjë ishte në rregull vetëm se Aleko duhet të priste. Ndërkohë që stalla duhet të merrte rrugë, Eltoni i premtoi t’i fuste vajzën në punë në bashkinë e Tiranës dhe kërkoi sërish 1 milionë e 200 mijë lekë për të bërë disa “dhurata”.
Meqë nuk po bëhej asgjë, qytetarit i filluan dyshimet dhe i kërkoi paratë mbrapsht. Elton Jaho premtoi se do ia kthente 5 milionë lekë, por njëherë i tha se i ka vdekur një i afërm e herën tjetër, se ishte i sëmurë me tumor.
Pas shumë peripecive, gazetarja e “Stop” e gjeti Elton Jahon shëndoshë e mirë, por ai vijoi avazin e premtimeve pa kthyer paratë.
Elton Jaho: Lashë edhe një afat me Alkon, tani për dy javë.
Gazetarja: The që do t’i ktheje për 10 ditë. Nga 10 ditë më premtove se këtë javë do t’ia kthesh lekët. Janë mashtrimet e radhës këto?
Elton Jaho: Jo, nuk ka asnjë mashtrim motër! Të lutem, e kam lënë në datën 5! Nuk kam asnjë mundësi. Me atë video që doli m’u prenë të gjitha, as familje, asgjë, kupton? Po flasim realitetin. Në datën 5 do ta likuidoj.
Gazetarja: Zotëri, kështu i the edhe javëën e kaluar po të them.
Elton Jaho: Moj zonjë, edhe njëherë po të them, e dini pozicionin tim tani?
Gazetarja: Nuk më intereson pozicioni yt! Pozicioni yt ishte pozicion mashtrimi! Ti do të vijë data 5, do të kalojë dataa 5, do të vijë data 10, do të mashtrosh ndonjë tjetër që t’i marrësh lekët t’ia japësh Alekos?
Elton Jaho: Në datën 5 e një sekondë, ju bëni të gjithë procedurën në polici dhe prokurori dhe s’është nevoja se iki vetë dorëzohem! Po ta them, në datën 5 unë e likuidoj zotërinë përfundimisht.
Saga e qytetarit ka hyrë në një spirale që nuk i duket fundi. Elton Jaho ka shtyrë disa herë afatet duke thënë se nëse nuk kthen paratë, do të shkojë vetë në polici.
Elton Jaho: Atëherë, kur të jem aty, do të marr dhe do të vij direkt në shtëpi, dakord?
Elton Jaho: Rreth orës 12, plus, minus, mund të vij edhe më herët, mund të vij edhe gjysmë ore me vonesë, diçka e tillë, por do të vij aty direkt në shtëpi, dakord?
Në komunikimin tjetër me gazetaren, Elton Jaho ka gati justifikimin e radhës.
Elton Jaho: Kam qenë te dentisti prandaj nuk të ashtu…
Gazetarja: Po, dakord! Të mora në datën 5 shkurt, Elton edhe më the që nuk ka mbaruar dita e datës kur ne lamë që ti do i ktheje paratë, apo jo?
Elton Jaho: Po, është e vërtetë.
Elton Jaho: Atëherë, unë me Alekon e kemi lënë për…
Gazetarja: Nuk ke lënë asgjë!
Elton Jaho: Po e kam lënë të enjten te noteri, moj! Unë të enjten i kthej lekët. Po s’ia ktheva, bëni çfarë të doni!
Gazetarja: Ti të enjten i ke dhe nuk i ke të martën?
Elton Jaho: Të enjten jap lekët, kaq!
Gazetarja: Po, po do i japësh lekët ti! Do ta shohim sa do i japësh!/
