Burime të reja informacioni kanë ardhur nga ana e policisë, lidhur me ekzekutimin e një 60-vjeçari në Shkodër një ditë më parë. Një kalimtar i rastit e ka parë të shtrirë në tokë dhe të gjakosur 60-vjeçarin Mehdi Kavaja, duke njoftuar më pas ambulancën. Vrasja ndodhi në lagjen Tophanë, aty ku Mehdi Kavaja punonte prej shumë vitesh në servisin e tij, me riparimin e dorezave të mjeteve.
Paraprakisht thuhet se vrasja, me shumë mundësi mund të ketë ardhur për disa konflikte që kanë të afërmit e tij prej vitesh. Vrasja mendohet se mund të jetë një hakmarrje për ngjarje të ndodhura para shumë viteve, ku ka dyshime se kanë qenë të përfshirë të afërm të shtetasit Mehdi Kavaja.
60-vjeçari ndodhej në servisin e tij duke punuar si zakonisht për riparimin e dorezave të makinave, kur papritur një person e ka qëlluar atë pas koke me pistoletë, duke e lënë të vdekur në vend. Pas ekspertizës së bërë, mjekët kishin parë një vrimë në kokën e tij, si dhe një plumb në thellësi të kokës.
Vrasja me pagesë
Duke iu referuar po kështu burimeve të policisë, kjo vrasje mund të jetë me pagesë. Kjo mbetet një prej pistave të momentit që po heton policia vendore e Shkodrës, ndërsa nuk përjashtohet edhe ndonjë mundësi tjetër.
Policia sekuestron kamerat e sigurisë
Policia ka sekuestruar kamerat e sigurisë, që mund të jenë në subjekte afër vendit të ngjarjes. Nga kqyrja e deritanishme nuk ka asnjë person konkret të dyshuar. Dyshohet se autori e ka studiuar mirë terrenin më përpara, për të arritur më pas tek ky ekzekutim që për nga mënyra për policinë, është vrasje profesioniste.
