Serbia dhe Kosova janë përplasur sërish në mbledhjen e Këshillit të Sigurimit në OKB, këtë herë për çështjen e UMNIK-ut.
Ministri i jashtëm serb, Ivica Daçiç kërkoi vazhdimin e këtij misioni për të mbrojtur të drejtat e serbëve, por ambasadorja e Kosovës në Shtetet e Bashkuara, Vlora Çitaku, tha se UNMIK-u duhet të përmbyllë misionin, pasi Kosova është vend i pavarur.
Daçiç theksoi se zgjidhja e çështjes së Kosovës duhet të marrë parasysh interesat e të dyja palëve, ndërsa u angazhua kundër anëtarësimit të Kosovës në policinë ndërkombëtare INTERPOL.
Ambasadorja Çitaku tha se çdo përpjekje për të rishkruar historinë do të dështojë, ndërsa Ushtria Çlirimtare e Kosovës nuk është organizatë terroriste por lëvizja më e suksesshme çlirimtare në historinë bashkëkohore.
Nga ana tjetër, SHBA-të kanë kërkuar nga Kosova që sa më shpejt të formojë qeverinë e re dhe të ratifikojë demarkacionin me Malin e Zi, ka thënë sot zëvendësambasadorja amerikane pranë Kombeve të Bashkuara, Michele Sison.
Gjatë fjalimit në KS të OKB-së, ku është prezantuar raporti më i ri tremujor për zhvillimet në Kosovë, zëvendësambasadorja amerikane tha se Kosova duhet të bëjë hapa drejt ndërtimit të një shoqërie multi-etnike.
Ajo ka kërkuar zvogëlimin gradual të UNMIK-ut në Kosovë dhe në fund përfundimin e mandatit të këtij misioni, si dhe që raportet e Këshillit të Sigurimit nga tre muaj sa janë aktualisht të mbahen çdo gjashtë muaj.
