Presidenti i Republikës Bajram Begaj thotë se nuk është penduar që ka dekretuar zgjedhjet për Tiranën, edhe pse kryetari i Bashkisë, Erion Veliaj, kishte ankimuar në Gjykatën Kushtetuese shkarkimin e tij nga Këshilli i Ministrave.
“Unë kam shkelur Kushtetutën?”, tha Begaj
“Nuk jam penduar aspak. Gjykata Kushtetuese, me vendimin e marrë për pezullimin e pjesshëm 1/6-tës së dekretit është shumë e respektuar nga ana jonë. Do të vazhdojmë me procesin deri sa çështja të diskutohet në tërësi”, shtoi ai.
I pyetur pse nuk e ka thërritur ende anëtarin e Gjykatës Kushtetuese, Asim Vokshi, për t’u betuar, Presidenti tha: “Ku e dini ju që nuk e kam thërritur. Kur të betohet do ta merrni vesh”.
Pas vendimit të Gjykatës Kushtetueses, Komisioni Qendror i Zgjedhjeve ka zyrtarizuar anulimin e zgjedhjeve në Bashkinë e Tiranës më 9 nëntor.
Në një konferencë të jashtëzakonshme për shtyp, kryekomisioneri Ilirjan Celibashi deklaroi se zgjedhjet e pjesshme do të mbahen në 5 bashkitë e tjera.
