Me tensione dhe debate mes mazhorancës dhe opozitës u zhvillua seanca e sotme parlamentare në Kuvend.
Gazetari, Ergys Gjençaj raporton për News24 se një nga përplasjet ka ndodhur mes Sekretarit të Përgjithshëm të Partisë Demokratike Flamur Noka dhe kreut të Grupit Parlamentar të PS, Taulant Balla, ndërsa “molla e sherrit” ishte çështja “Aruba”.
“Diskutimi tregoi një përplasje mes mazhorancës dhe opozitës. Ishte Flamur Noka cili në deklaratën e tij kujtoi sipas tij, akuzat ndaj mazhorancës për të ashtuquajtuarën takimi në Aruba. Përfaqësues të maxhorancës, sipas tij, kanë zhvilluar takime me narko-trafikantë. Por në përgjigje të Flamur Nokës, Taluant Balla kreu i grupit parlamentar të PS, deklaroi se së paku Noka duhet të deklarojë emrat nëse ka dijeni. Dhe më pas të bënte një kallëzim në SPAK. Ndërkohë teksa Taulant Balla mbante fjalën e tij në Parlament, deputetët e opozitës braktisën sallën”, tha ai.
Ndërkohë deputetja e PS, Sara Mila, në deklaratën e saj në Kuvend tha se deputetët e opozitës e shkatërruan debatin më të rëndësishëm sipas saj, siç është ajo e projekteve. Mila pretendon se në këtë debat si deputetet e re ishte përgatitur për “debat politik”.
Ajo tha se historikisht në parlamentin shqiptar deputetët e PS kanë punuar, dhe sipas saj, të PD kanë shkatërruar.
Fjalimin e parë në seancë e kishte deputetja Zegjine Çaushi, duke iu drejtuar deputetëve të opozitës me tone kritike.
Ajo u shpreh se është e papranueshme që në seancë të dëgjohet i njëjti fjalor nga opozita, ndërsa shtoi se edhe në seancën e fundit asnjë prej tyre nuk ka folur për procesverbalin, por “janë marrë me ofendime”.
Seanca e sotme zgjati dy orë dhe kulmoi me votimin nga ana e deputetëve të maxhorancës, të kalendarit të punës dhe programit të punës së parlamentit të Shqipërisë. Me këtë votim nga dita e nesërme komisionet parlamentare nisin funksionimin e tyre të plotë, për nisma të ndryshme ligjore.
