Seanca e dytë e përbashkët mes Kuvendit të Shqipërisë dhe të Kosovës në Prishtinë nuk kaloi pa momente pikante dhe të papritura.
Deputetët e grupit parlamentar të Partisë Demokratike mbërritën ndër të parët në Kuvendin e Kosovës, por jo edhe në hyrjen e duhur, për çka u udhëzuan nga stafi i Parlamentit se duhet të kalojnë nga krahu tjetër.
Kryeparlamentarja Elisa Spiropali u prit nga homologu i saj, Glauk Konjufca. Pas një përqafimi të ngrohtë, Konjufca pas interesimit të Spiropalit tregoi për gëzimin për lindjen e vajzës vetëm pak ditë më parë.
Kryeministri Edi Rama erdhi i pari në Kuvend dhe u prit nga të dy kryeparlamentarët. Mirëpo harruan ta prisnin Kurtin, që erdhi vetëm pak momente më vonë.
Të dy kryeministrat dhe të dy krerët e Kuvendeve u takuan në zyrën e Konjufcës. Pak momente më vonë aty erdhi edhe presidentja Vjosa Osmani që gjithashtu mbajti një fjalim në seancë pavarësisht se nuk ishte parashikuar në agjendë.
Ndërsa liderët po takoheshin, ministrat dhe deputetët në sallën plenare e shfrytëzonin kohën për të biseduar mes vete.
Pas ardhjes në sallë, Rama pati një përshëndetje të veçantë për kryetarin e AAK-së, Ramush Haradinaj, një dëshmi se mospajtimet mes tyre deri në padi, tashmë i përkasin së shkuarës.
Fjalimi i kryeministrave u shoqërua me duartrokitje, kryesisht nga partitë e tyre. Pas përfundimit të adresimit të Ramës, deputetët e partive opozitare PDK e AAK u ngritën në këmbë por nuk u ndoqën nga ata të mazhorancës në Kosovë.
Deputeti i vetëm shqiptar në Parlamentin serb, Shaip Kamberi, ishte gjithashtu i pranishëm në këtë seancë. Megjithëse prania e tij nuk ishte vënë re nga drejtuesit e seancës.
Presidentja Vjosa Osmani ishte e para që u largua nga seanca në momentin kur Ramush Haradinaj doli në foltore.
Fjalimi i Haradinajt nuk i pëlqeu ministrave të Qeverisë së Kosovës dhe deputetëve të mazhorancës që u larguan nga salla, ndërsa edhe Kurti nuk po pajtohej më atë që thoshte kryetari i Aleancës për Ardhmërinë e Kosovës.
Gjatë fjalimit të Haradinajt, kryeministri Rama vendosi t’i shkruante një letër Kurtit. Meqë Kurti dukej se ishte nervozuar me Haradinajn nuk po e hapte letrën dhe u desh sërish Rama t’ia kujtonte.
Pas një miratimi me kokë, Rama largohet nga seanca duke u rikthyer vetëm pas fjalimit të Gazment Bardhit.
Deputetët e Aleancës për Ardhmërinë e Kosovës u bënë sërish protagonist kur në foltore doli Mimoza Kusari – Lila. Ata bërtitën “zdravo”, një fjalë që asocion me bisedat e publikuar mes shefes së grupit parlamentar të Vetëvendosjes me përfaqësuesit e Listës Serbe.
Ndryshe nga Kurti, Rama u duk më i interesuar të votonte për deklaratën e përbashkët mes dy Kuvendeve që u miratua formalisht nga deputetët pjesëmarrës.
Menjëherë pas seancës, Kurti e Rama u drejtuan drejt Qeverisë, në një takim që zgjati jo më shumë se pesë minuta. Të dy kryeministrat aty firmosën një marrëveshje bashkëpunimi për Lojërat Mesdhetare “Prishtina 2030” që e bën Durrësin një nga qytetet mikpritës.
Me një shkelje syri dhe pa iu përgjigjur interesimit të gazetarëve, Rama e Kurti u larguan nga ndërtesa qeveritare dhe shkuan drejt restorantit ku drekuan së bashku edhe me kryeparlamentarët dhe deputetët.
