Ministria e Mbrojtjes në raportimin e fundit mbi situatën nga përmbytjet në vend, ka evidentuar se janë 7 qarqe, të cilat janë prekur nga reshjet e dendura të shiut, që shkaktuan dëme në banesa, toka bujqësore dhe infrastrukturë.
Ministri Pirro Vengu nga Fieri tha se situata më e vështirë mbetet në Lezhë, Dibër, Fier, Berat, Korçë, Gjirokastër dhe Vlorë, ndërsa në total janë rreth 1 mijë banesa të përmbytura.
Në Lezhë, situata paraqitet e vështirë në zonat e përmbytura në Barbullojë, Myltë e Rrilë, ku shumë banesa ndodhen nën pushtetin e ujit.
Banorët shprehen se dëmet nga uji në banesa, toka dhe bagëti janë të shumta gjatë orëve të fundit.
Në Qarkun e Korçës u shënua viktima e parë për shkak të përmbytjeve. Një 76-vjeçare në zonën e Devollit, e cila ishte shpallur e humbur prej të premtes, pas kërkimeve, iu gjet trupi i pajëte.
Uji është prezent në disa banesa në Lumalas, Bulgarec, Shamoll, Çiflig, Turan, Vloçisht e Sovjan, ku dhe janë evakuuar disa familje nga ekipet e emergjencave në terren. Ndërkohë, po punohet për pastrimin e dherave në Dardhas, Proptisht, Çërravë.
Ndërkohë, që rreziku nga lumi Vjosë është tejkaluar në zonën e Fierit dhe Vlorës, edhe pse disa familje ende janë të evakuuara nga shtëpitë e tyre, për arsye sigurie.
