Të paktën 31 të burgosur u gjetën të vdekur në burgun El Oro në qytetin jugor të Machalës, në Ekuador, njoftuan autoritetet lokale, me 27 prej tyre të varur. Ngjarja ndodhi të dielën në mëngjes gjatë një përleshjeje midis bandave rivale, e cila shkaktoi edhe vdekjen e katër të tjerëve dhe plagosjen e mbi 34 të burgosurve të tjerë.
Sipas Shërbimit të Burgjeve të Ekuadorit, disa orë më vonë, rojet, të paralajmëruar për një shpërthim të ri dhune, gjetën të burgosurit e mbetur të varur në katin e tretë të burgut. Burgjet e vendit, të cilat shpesh funksionojnë përtej kapacitetit, kanë regjistruar dhjetëra përleshje vdekjeprurëse midis bandave vitet e fundit. Shërbimi i burgjeve tha se përleshjet e fundit duket se janë nxitur nga planet për të transferuar disa të burgosur në një burg të ndërtuar rishtas.
Ky nuk është incidenti i parë fatal në El Oro. Në shtator, 13 të burgosur dhe një roje humbën jetën në një përleshje të ngjashme. Të afërmit e të burgosurve po kërkojnë nga autoritetet të shtrëngojnë masat e sigurisë, përfshirë largimin e bandave rivale, ndërsa banorët e Machalës kërkojnë prej vitesh zhvendosjen e burgut nga qendra e qytetit. Qeveria e Presidentit Daniel Noboa njoftoi këtë vit ndërtimin e burgut të ri me siguri maksimale, El Encuentro, në provincën e Santa Elenës. Objekti i ri pritet të hapet në fund të nëntorit dhe do të ketë masa moderne sigurie, sipas ministrit të Brendshëm.
