Një rast i rëndë i keqtrajtimit të kafshëve është zbuluar nga Policia në Librazhd, ku një 32-vjeçar është proceduar penalisht pasi promovoi një përleshje mes një qeni dhe një maceje në rrjetet sociale.
Shtetasi A. Gj., 32 vjeç, është identifikuar nga shërbimet e Komisariatit të Policisë Librazhd si autori i publikimit të pamjeve ku shfaqej një përballje e organizuar mes dy kafshëve shtëpiake.
Videot ishin shpërndarë në rrjete sociale me qëllim tërheqjen e vëmendjes dhe angazhimin e ndjekësve, por kanë shkaktuar reagime të forta nga qytetarët dhe aktivistët për të drejtat e kafshëve.
Policia e cilëson ngjarjen si një formë të qartë të dhunës ndaj kafshëve dhe thekson se një sjellje e tillë është e papranueshme dhe dënohet sipas Kodit Penal. Materialet procedurale ndaj 32-vjeçarit janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme ligjore.
