Frederik Veseli ka zgjatur kontratën e tij me klubin e Empolit deri në vitin 2022. Mbrojtësi la pas dëmtimin që e mbajti rreth 1 muaj jashtë fushës së blertë, për t’u aktivizuar më pas me përfaqësuesen shqiptare e po ashtu me klubin italian.
Lojtari u kthye në formë mjaft të mirë, paraqitjet e të cilit nuk kaluan pa u vënë re. Kështu, edhe pse Veseli kishte firmosur deri në qershorin e vitit 2021, te Empoli janë të ndërgjegjshëm se me këto paraqitje mund të afrohen klube me pretendime më të mëdha që mund të afrojnë futbollistin e kuqezinjve. Për këtë arsye, Veseli dhe klubi kanë gjetur akordin për të zgjatur marrëveshjen aktuale deri në vitin 2022, shkruan “Gazzetta Dello Sport”.
Mbrojtësit i është përmirësuar kontrata sa i përket përfitimeve financiare të tij, për të kënaqur disa kërkesa, pasi parametrat ishin ato të skuadrave të Serisë B dhe Veseli tashmë shihet si një nga emrat me perspektivë te klubi italian.
