Në Spanjë kanë mbetur dhe dy javë nga përfundimi i merkatos së verës dhe Florentino Perez është i vendosur që të sjellë në ekip përforcime të mëdha për të mbushur boshllëkun që la largimi i Cristioano Ronaldos. Në arkat e madrilenëve janë plot 300 milionë euro për tu shpenzuar dhe po shikohen mundësitë më të mira.
Humbja 4-2 në Superkupën e Europës përballë Atletico Madridit ka ndezur sinjalet e alarmit se ndërhyrja është e domosdoshme në merkato. Deri më 31 gusht një emër i madh duhet të prezantohet në Madrid. Me 300 milionë euro mund të blehen disa lojtarë, por po mendohet edhe një emër i vetëm dhe ai është Neymar.
Gazeta spanjolle “Marca” shkruan se kërkesat e Lopetegui janë të qarta, kërkon nga një lojtarë në çdo repart, pasi është larguar edhe Kovacic e Teo Hernandes, përveç Ronaldos. Perez po mendon që të bëjë një goditje të dyfishtë nga Serie A, më shumë në shenjë hakmarrje ndaj Interit për çështjen ‘Modric’, e cila duket se e ka nervozuar shumë dhe ka bërë një denoncim në FIFA.
Madrilenët kërkojnë të forcojnë sulmin dhe nga Interi pritet të provojnë të rrëmbejnë kapitenin Mauro Icardi, një pistë e vështirë, pasi mes klubeve raportet nuk janë aspak të mira. Por jo vetëm kaq, pasi emri më i pëlqyer për mbrojtjen duket se është Milan Skrinar, qendërmbrojtësi i cili zhvilloi një sezon fantastik me zikaltërit. Duken dy tratativa mjaft të vështira, pasi të dy lojtarët janë ndër më të rëndësishmit për Spallettin dhe vështirë që Interi të pranojë ndonjë ofertë.
