Kuqezinjtë munden nga Skocia me rezultatin 2-0, në një ndeshje për tu harruar, pasi Shqipëria nuk tregon asgjë. Futbollistët “zhduken” në fushë mes shiut të rrëmbyeshëm, por edhe falë presionit të vendasve. Kjo ndeshje ishte e vlefshme për Ligën e Kombeve, Grupi 1 i Ligës C, e cila tashmë kryesohet nga Skocia por me pikë të barabarta me kuqezinjtë.
Që në startin e ndeshjes kuqezinjtë tërhiqen në mbrojtje dhe i lënë shumë territor skocezëve që të rrinë vetëm në sulm. Ndoshta skema ishte të shfrytëzonim kundërsulmet, por në pjesën e parë nuk u pa asnjë iniciativë e tillë. Vendasit i afrohen golit që në minutën e 24’, por është shtylla që shpëton Strakoshën.
I njëjti protagonist, Naismith dërgon topin në rrjetën e portës kuqezi në të 41’, por anësori ka sinjalizuar për pozicion të parregullt. Shqipëria reagon me Memushaj që në të 42’ ka një rast të artë, kur në kundërsulm, në hyrje të zonës së Skocisë ka goditur, por topi përfundon jashtë kuadratit.
Ende pa nisur mirë pjesa e dytë, Skocia ka tronditur kuqezinjtë me autogolin e Gjimshitit me kokë, nen presionin e Naismith. Reagimi i kuqezinjve është me Balaj që i vetëm përballë portierit, dërgon topin jashtë portës së Skocisë. Sulmuesi shkodran është sërish protagonist në të 50’, kur dorëzon në duart e portierit kundërshtar një top të artë të shërbyer nga Xhaka.
Të panumërta janë rastet e përfaqësueses së Skocisë në zonën kuqezi, për të kulmuar në të 59’ me rastin e McGregor që nën presionin e Veselit nuk arrin të dërgojë topin në rrjetë. Në të 66’ Balaj ka shanset të minimizojë humbjen, kur topin e asistuar nga Ndoj e dërgon mbi traversë. Kuqezinjtë arrijnë të menaxhojnë situatën në gjysmëfushën e tyre, për të mos pësuar një gol të tretë, por ndërkohë duket se i janë dorëzuar humbjes së sigluar që në minutën e 68’.
