Aktivisti i Lëvizjes Bashkë Jani Marka, i ftuar në një studio televizive foli mbi protestën e dytë të organizuar sot nga pensionistët para Kryeministrisë. Marka tha se pensionistët e kanë nxjerrë ‘lakuriq’ Edi Ramën dhe kundër reagimet e tij lidhen me protestat e nisura prej dy javësh. Marka u shpreh se deri më sot Rama ka menduar se i ka pensionistët në xhep, por tashmë është në panik nga pikëpamja elektorale. Marka tha që pensioni minimal duhet të shkojë në nivelin e minimumit jetik.
“Rritja e pensioneve është kërkesa numër një, por ka edhe kërkesa të tjera. Disa barna janë hequr nga lista e barnave të rimbursueshme, ka ndryshuar cilësia. Kanë pak hapësira. Ka lagje të tëra si ‘Astiri’ ku mungojnë hapësirat publike për pensionistët. Pensionistët e kanë nxjerrë lakuriq Edi Ramën. Gjithë ky kundër reagim i Ramës vjen nga protestat e pensionistëve që kanë nisur prej dy javësh.
Gjeta një deklaratë të Ramës në 2014-ën Rama thoshte që do çonte përballë përgjegjësisë penale ata që shkelin ligjin për kontributet shoqërore, por asnjëherë s’e ka ndërmarrë. Rritja e pensioneve e para duhet parë në lekë, e dyta në raport me çmimet, që rritja të jetë reale. Ne i kemi çmimet njësoj si në Gjermani, sidomos të shportës, ndërkohë që ka produkte edhe më shtrenjtë se në gjermani. Çmimet i kemi si në Gjermani, pagat dhe pensionet si në Afrikë.
Ne propozojmë që pensioni minimal 85 mijë lekë, të shkojë në nivelin e minimumit jetik. Ne e kemi çuar në Kuvend projektligjin për minimumin jetik, ndërkohë që ligjet për oligarkët kalojnë për dy ditë. Shteti ynë është kapur nga interesat e krimit të organizuar.
Deri më sot Rama dhe PS ka kujtuar se i ka pensionistët në xhep. Është krijuar një farë miti sikur pensionistët do votojnë PS-në. Përpjekja e Ramës është në panik nga pikëpamja elektorale, ndryshe nuk shpjegohet që ka nxjerrë gjithë ministrat për fotografi me pensionistët. Protestat janë në rritje, besoj do shtrihen edhe në qytetet e tjera. Kjo është një kauzë e jashtëzakonshme, jo vetëm për pensionistët, por për të ardhmen e Shqipërisë. Të dielën do organizojmë një takim me pensionsitët në Fier”.
