Partia Demokratike shqiptare në Preshevë sot mbajti një konferencë për medie, për ngjarjet e fundit në komunën e Preshevës, si dhe politikat rajonale në Kosovë dhe Maqedoni.
Në këtë konferencë foli kryetari i PDSH-së, Ragmi Mustafa, nënkryetari i kësaj partie Ilir Sadriu dhe anëtari i kryesisë dhe këshilltari në kuvendin komunal, Shpat Aliu.
Kryetari Mustafa ka akuzuar rëndë pushtetin aktual, duke e quajtur si kuvend i fundosjes.
“Nuk do shumë mend për ta kuptuar këtë pushtet të verbëruar që shohin vetëm para hundës së tyre, sa që shohin vetëm një rrethinë e një distancë vetëm para veti e jo më tepër, që kur është krijuar kjo shumicë e re, nuk është zgjedhë zëvendëskryetari i komunës, një pikë e rendit të ditës, e cila në një paturpësi thonë, do të vazhdojë ajo pikë e rendit të ditës e cila prolongohet deri në pakufi”, ka thënë Mustafa.
Ai shton, se kjo tregon paaftësinë e kryetarit të Kuvendit, paaftësinë e kryetares së Komunës, paaftësinë e grupit të këshilltarëve që ndërtojnë një koalicion i përbërë nga 22 partnerë, të cilët nuk mund të merren vesh kurrë për një pikë të rendit të ditës.
Kryetari i PDSH-së, ka akuzuar qeverisjen lokale për mosemërimin e drejtorit të televizionit Presheva, duke e quajtur si kuvend i shpëtimit si kuvend i fundosjes.
“Ky pushtet as që është i interesuar për qytetarin, pasi është i fokusuar dhe lidhur në vetvete, i dashuruar fund e krye në vetvete, për të punësuar sa më shumë familjar në organet ekzekutive udhëheqëse të komunës së Preshevës”, ka thënë ai.
