Partia Demokratike ka depozituar një kallëzim penal në Prokurorinë e Tiranës ndaj kandidatit të Partisë Socialiste për deputet në Shkodër, zona e Fushë Arrëzit, Ervin Doda. Sipas kallëzimit të nënshkruar nga Sekretari i Përgjithshëm i PD, Flamur Noka, Doda akuzohet për fshehje të së shkuarës së tij penale në formularin e dekriminalizimit.
Sipas dokumentit të dorëzuar në prokurori, Ervin Doda është arrestuar në vitin 2016 dhe ka qëndruar pesë muaj në paraburgim, si i dyshuar për veprat penale të kanosjes dhe armëmbajtjes pa leje. Edhe pse në përfundim është shpallur i pafajshëm, PD argumenton se vetë fakti i arrestimit dhe paraburgimit duhet të ishte deklaruar.
Doda ka plotësuar formularin e dekriminalizimit dy herë: në vitin 2023 si anëtar i Këshillit Bashkiak të Fushë Arrëzit dhe në vitin 2025 si kandidat për deputet në zgjedhjet e 11 majit. Në të dy formularët, ai ka deklaruar se nuk ka qenë ndonjëherë i arrestuar për kryerjen e një vepre penale.
Në kallëzim thuhet se kjo përbën konsumim të veprës penale të “falsifikimit të vulave, stampave ose formularëve”, parashikuar nga neni 190, paragrafi i dytë i Kodit Penal.
Aktualisht, Prokuroria e Tiranës nuk ka reaguar zyrtarisht për kallëzimin, ndërsa pritet verifikimi i fakteve dhe vendimmarrja mbi nisjen ose jo të hetimeve.
